Reyndi að keyra á fyrrverandi sambýliskonu

Hæstiréttur staðfesti í dag gæsluvarðhaldsúrskurð Héraðsdóms Reykjavíkur yfir karlmanni sem gefið er að sök að hafa hent skiptilykli í gegnum rúðu á svefnherbergi fyrrum sambýliskonu sinnar. Í kjölfarið á hann að hafa reynt að keyra á hana í bíl sínum. Konan er sannfærð um að maðurinn hafi ætlað að drepa sig. Maðurinn verður auk þess í einangrun á meðan á gæsluvarðhaldinu stendur.

Í greinargerð lögreglustjóra, sem héraðsdómur byggði úrskurð sinn á, kemur fram að líkamsrárásin hafi verið tilkynnt lögreglu klukkan 7:30 aðfaranótt sunnudags. Lögregla hafi komið á vettvang og hitt fyrir konuna og dóttur hennar. Konan var meidd á fæti og hrufluð á hendi.

Skýrði konan frá því að maðurinn hefði kastað skiptilykli í gegnum rúðu á svefnherbergi hennar og í kjölfarið hafi hún farið út. Hafi þá maðurinn gert tvær tilraunir til að aka á konuna í bíl sínum. Hann hafi því næst ekið burt á miklum hraða. Dóttir brotaþola sem hafi verið á vettvangi hafi lýst árásinni með sama hætti. Konan kvaðst vera mjög hrædd við kærða, sem er fyrrum sambýlismaður hennar, og var sannfærð um að hann hafi ætlað að drepa sig.

Lögreglan fann umræddan bíl við Miðbakka síðar um morguninn og handtók manninn á hóteli í bænum um klukkan 15 á sunnudag. Ákærði hafi játað við skýrslutöku að hafa verið á vettvangi auk þess að hafa kastað skiptilyklinum. Hann neitaði þó að tjá sig um önnur atriði.

Í rökstuðningi lögreglu fyrir gæsluvarðhaldi kemur fram að rannsókn málsins sé skammt á veg komin og sé hún á viðkvæmu stigi. Kærði liggi undir rökstuddum grun um að hafa gert lífshættulega atlögu að fyrrum sambýliskonu sinni.

„Að mati lögreglu sé gæsluvarðhald nauðsynlegt til þess að unnt verði að vinna að rannsókn málsins. Fyrir liggi að taka þurfi skýrslur af brotaþola og öðrum vitnum sem hafi gefið sig fram á vettvangi. Þá liggi fyrir lögreglu að taka frekari skýrslur af kærða,“ segir í greinargerðinni.

Yfirgnæfandi líkur bendi til þess, gangi kærði frjáls ferða sinna, að hann kunni að torvelda rannsókn málsins, s.s. með því að hafa áhrif á framburð vitna.