Færri sem hafa eingöngu lokið grunnmenntun

Á síðasta ári höfðu 45.400 manns á aldrinum 25-64 ára eingöngu lokið grunnmenntun, þ.e styttra námi en framhaldsskólastigi. Það eru um 27,8 prósent íbúa og hefur fækkað úr 34,4 prósent árið 2003. Þetta kemur fram í niðurstöðum úr Vinnumarkaðsrannsókn Hagstofu Íslands.

Þegar litið er á fjöldatölur hefur íbúum með grunnmenntun fækkað um 3.800 frá árinu 2003 og um 1.700 frá árinu 2012. Þá höfðu 36,1 prósent íbúa mest lokið starfs- eða framhaldsmenntun, þ.e lokið námi á framhaldsskólastigi sem er að minnsta kosti tvö ár að lengd eða lokið námi á viðbótarstigi, eða 58.900 manns. Álíka margir, 58.700, höfðu lokið háskólanámi, eða 36,0 prósent íbúa á Íslandi á þessu aldursbili. Háskólamenntuðum hefur fjölgað um 19.400 frá árinu 2003, þegar þeir voru 27,5 prósent íbúa.

Þá var mikill munur á menntun íbúa höfuðborgarsvæðisins og landsbyggðarinnar árið 2013. Á höfuðborgarsvæðinu höfðu 22,7% íbúa á aldrinum 25-64 ára eingöngu lokið grunnmenntun en 42,3% höfðu lokið háskólamenntun. Utan höfuðborgarsvæðisins höfðu 37,0% íbúa eingöngu lokið grunnmenntun og 24,7% lokið háskólamenntun.