Formaður múslíma segir fordómafulla kjána ekki svara verða

Gústaf Níelsson sagnfræðingur ritar grein sem hann birtir í Morgunblaðinu í dag, þar sem hann kvartar sáran undan hryssingslegum viðbrögðum Ibrahim Sverris Agnarssonar formanns Félags múslíma á Íslandi á málþingi Siðmenntar um Íslam, sem haldið var nú um helgina síðustu.

Gústaf innti Sverri eftir viðhorfum hans til áðurbirts bréfs hans þar sem Gústaf vekur athygli á því sem hann telur augljóst ósamræmi milli orða Sverris og svo Salmans Tamimis, fyrrverandi formanns félagsins.

„Það er svo fremur pirrandi að af okkur skuli vera ætlast að við hlaupum upp til handa og fóta og svörum allri þeirri vitleysu sem stöðugt veltur upp úr fordómfullum kjánum þessa lands,“ segir Sverrir og gefur engan afslátt þegar blaðamaður Vísis innti hann eftir þessu atviki.

Gústaf segir Salmann hafa sagt að ekki kæmi til greina að fjármagna fyrirhugaða byggingu mosku með fjármagni sem komi erlendis frá. Að hún yrði „að vera gerð á íslenskum forsendum. Um leið og maður missir sjónar á því hvaðan fjármagnið fyrir henni kemur eða afhendir stjórnartaumana einhverjum aðilum úti í heimi missir maður tökin á því sem skeður í framhaldinu“. Sverrir hefur hins vegar sagt að til standi að leita fjármagns erlendis frá. Þegar Gústaf spurði Sverri út í þetta misræmi svaraði Sverrir: „Svarið er; þú ert fordómafullur idjót!“ Gústaf furðar sig á þessu svari og ber sig aumlega við lesendur Morgunblaðsins.

Vísir endurtekur spurninguna og spyr Sverri hvort þetta sé ekki augljóst misræmi:

„Í viðtalinu við Salmann er ekkert sagt um erlenda fjármögnum öðruvísi en ég hef orðað það, við tökum ekki við fjármagni sem við vitum ekki hvaðan kemur eða felur í sér að við missum fulla stjórn á moskunni hvað varðar stefnu, útgáfu eða val á Imam. Það er engin ágreiningur okkar á milli varðandi fjármögnun moskunnar.“

En, hvernig líður byggingunni?

„Samkeppni, í samvinnu við Arkítektafélag Íslands og Reykjavíkurborg, um teikningar á húsinu er á döfinni og þessa dagana er verið að ganga frá samkeppnislýsingunni. Ég verð vonandi byrjaður að byggja næsta sumar.“