Í frönskum og fáguðum stíl

Ævinýraleg stakkaskipti hafa orðið á Franska spítalanum sem stóð á Hafnarnesi við Fáskrúðsfjörð í áratugi og grotnaði niður. Nú setur húsið glæsilegan svip á bæinn á Fáskrúðsfirði þar sem hann er umkringdur gömlum húsum sem gerð hafa verið upp í sama anda. Þar er verið að opna hótel í nafni Fosshótelkeðjunnar og innan dyra er allt í frönskum og fáguðum stíl. Hafnarmegin í húsinu verður veitingastaður, L'Abri, en nafnið þýðir skjól. Áhersla verður lögð á ferskt íslenskt hráefni með frönskum blæ, að sögn Óskar Heiðu Sveinsdóttur markaðsstjóra. „Þetta hótel verður alger gullmoli,“ segir hún.

Smíðuð hefur verið bryggja við hótelið og hver veit nema í framtíðinni verði frönsk skúta bundin við hana.

Gamla læknishúsið stendur gegnt spítalanum – þar er búið um rúm með rómantískum hætti. Milli húsanna eru jarðgöng sem meitluð voru í klöppina undir götunni. Fyrir utan að þjóna sem samgönguæð hefur verið innréttað skútulíkan í göngunum með tilheyrandi góssi.

Við annan stafn læknishússins streymir tær lækur niður hlíðina. Í honum eru steinar með nöfnum franskra skipa sem fórust á skútuöldinni. Á hinum lækjarbakkanum stendur kapella nýuppgerð því þegar franskir sjómenn gerðu staðinn að aðalbækistöð sinni við austurströnd Íslands voru sjúkraskýli og kapella það fyrsta sem þeir byggðu laust fyrir aldamótin 1900. Við hlið spítalans er svo líkhúsið. Þar eru lítil herbergi til að gista í.

Minjavernd ber ábyrgð á framkvæmdunum í samvinnu við bæjaryfirvöld í Fjarðabyggð og franska velunnara.