Fyrsta íslenska viskýið á leið á markað

Fyrsta íslenska viskýið er komið á flöskur og fer í dreifingu á næstunni. Framkvæmdastjóri Eimverks sem framleiðir viskýið segir fyrirtækið ætla sér stóra hluti í framtíðinni og hefur nú þegar lagt í 12 ára viskí sem verður tilbúið  árið 2023.

Viský vekur oftast hugrenningartengsl við Skotland og Írland sem sennilega eru stærstu framleiðslulönd á þessum guðaveigum. En í Skotlandi eru t.d. fluttar út 40 viskýflöskur á hverri sekúndu sem líður allan sólarhringinn.

En einhvers staðar byrjuðu þessir stórframleiðendur og nú hefur íslenska nýsköpunarfyrirtækið Eimverk, sem nú þegar framleiðir vinsælt Gin, tappað fyrsta viskýinu, Flóka,  á flöskur. Haraldur Þorkelsson framkvæmdastjóri fyrirtækisins segir landsmenn fá fyrsta tækifærið til að bragða á framleiðslunni á sýningunni Matur og drykkur sem fram fer í Laugardalshöll um helgina.

Íslenskt viský, það hljómar einhvern veginn ótrúlega, þurfa menn ekki að láta það liggja í nokkurn tíma áður en það er sett á flöskur?

Jú, viský þarf að liggja í eyk í helst þrjú ár og þetta tekur allt góðan tíma. En við erum núna að tappa á af fyrstu tunnunni í þessum mánuði eftir um það bil fimm ára þróunarstarf,“ segir Haraldur.

„Það er bara furðulegt að þetta hafi ekki verið gert á Íslandi fyrr. Íslenska byggið og náttúran koma sterk inn og þetta virkar ótrúlega vel,“ segir Haraldur. Flóki minni helst á hálanda viskýið skorska.

Engu að síður sé bragðið af Flóka einstakt. Íslenska byggið sem vaxi við köld skilyrði sé kraftmikið og gefi gott og kryddað bragð. Til að byrja með er Flóka viskýið ungt en Eimverk stefnir á framleiðslu á eldra viskýi.

„Við endum með tólf ára viský já. En í dag erum við að fara af stað með takmarkað upplag. Það eru um 500 flöskur í mánuði sem við köllum Flóki Young Malt,“ segir Haraldur.

Tólf ára Flóki komi síðan á markaðinn árið 2023. Til að byrja með verður Flóki seldur í Fríhöfninni og á völdum veitingastöðum í Reykjavík

„Eins erum við með dreifingaraðila í útlöndum sem bíða spenntir. En þetta verður sent til Þýskalands, Danmerkur, Ítalíu og bandaríkjanna á næsta ári,“ segir Haraldur. Þetta nýjasta viský á heimsmarkaðnum verði í hærri kantinum hvað verðlag snerti en sanngjarnt samt.

Hægt er að hlusta á viðtalið í heild hér.