Veikir og slasaðir bangsar fá umönnun

Lýðheilsufélag læknanema heldur í samstarfi við fyrstu árs læknanema Bangsaspítalann á Barnaspítala Hringsins í dag. Veikir og slasaðir bangsar eiga kost á læknisaðstoð á milli klukkan 11 og 17. Öll börn á aldrinum 3-6 ára eru boðin velkomin en veikir og slasaðir bangsar geta þá farið í allsherjar skoðun.

Tilgangur verkefnisins er tvíþættur: Annars vegar til að fyrirbyggja hræðslu hjá börnum við lækna, heilbrigðisstarfsfólk og spítalaumhverfið og hins vegar að gefa læknanemum á yngri árum tækifæri til að æfa samskipti við börn

Heimsóknin fer þannig fram að hvert barn kemur með sinn eigin bangsa. Gott er að ræða fyrirfram við barnið um það hvernig bangsinn er veikur (hvort hann sé t.d. með hálsbólgu, magapest eða brotinn fót). Þegar á spítalann er komið fær barnið að innrita bangsann og að því loknu kemur bangsalæknir og vísar barninu inn á læknastofu þar sem læknirinn skoðar bangsann og veitir honum þá aðhlynningu sem hann þarf á að halda.

Nánar um Bangsaspítalann hér.