Þjófnaður að rukka ferðamenn

Héraðsdómur Suðurlands féllst í apríl á lögbannskröfu íslenska ríkisins á innheimtu gjalds af ferðamönnum við Geysi. Svokallað staðfestingarmál verður flutt fyrir héraðsdómi í fyrramálið en að því loknu tekur lögbannið endanlega gildi.

Garðar Eiríksson, talsmaður landeigendafélags Geysi, segir það ósanngjarnt að lagt sé lögbann á gjaldtöku félagsins, á meðan aðrir landeigendur séu látnir óáreittir.

„Þá spyr maður sig, erum við svona öðruvísi en allir hinir. Erum við ekki jafn réttháir og aðrir. Er eignarréttur okkar eitthvað minna virði heldur en annara. Ég tel að núna hafi átt sér stað mismunun, þar sem ríkið sem minnihlutaeigandi á Geysissvæðinu hafi haldið á sínum málum með þessum hætti.“

Hann segir með engu móti hægt að spá hverjar lyktir málsins verða. Hann hafi þó áhyggjur af næsta sumri

„Ragnheiður Elín Árnadóttir, ráðherra ferðamála, hitti mig fyrir þremur vikum og þá ætlaði hún að hitta mig í kaffisopa núna um mánaðarmótin og ég vona að það standi og við finnum einhverja lausn sem gæti orðið virk fyrir næsta sumar. En þetta ástand gengur ekki lengur, því miður. Fjöldi gesta sem hingað koma er orðinn það ríkulega mikill að við getum hreinlega ekki haldið svona áfram.“

Ögmundur Jónasson, þingmaður Vinstri grænna, segir málið ekki flókið.

„Staðreyndin er sú, að samkvæmt náttúruverndarlögum, að þá er einkaaðilum óheimil gjaldtaka við náttúrugersemar, nema samkvæmt þar til gerðum samningi við Umhverfisstofnun. Þeir samningar eru ekki fyrir hendi.“

Ögmundur segir lögregluna þurfa að stöðva ólögmæta gjaldtöku.

„Ef að lögreglan sér að það er verið að hafa fé af fólki á ólögmætan hátt, það er kallað þjófnaður eða stuldur, þá stöðvar lögreglan slíkt. Ég skil ekki hvers vegna hún gerir það ekki. Og ég skil ekkert í ríkisstjórninni, og stjórnvöldum almennt, að grípa ekki í taumanna. Ef svona fer fram, þá er það ávísun á niðurbrot á réttarríki,“ segir Ögmundur.