Féll fimmtán metra en gengur óstuddur

„Ég er bara farinn að labba um, get að vísu ekki hlaupið enn, en ég keypti mér reiðhjól. Þessu fylgja auðvitað verkir, sjúkraþjálfun og píningar en þetta er allt að koma,“ segir Ævar Sveinn Sveinsson, 24 ára smiður úr Árbænum.

Ævar lenti í hörmulegu vinnuslysi í Kórahverfinu í febrúar þegar hann féll 15 metra niður á steinsteypta stétt. Hann hlaut opið beinbrot á báðum ökklum, hryggbrotnaði og mjaðmagrindarbrotnaði og var fluttur í skyndi á sjúkrahús þar sem hann gekkst undir aðgerð sem tók níu klukkustundir.

Við tók dvöl á endurhæfingardeild Grensásdeildar og nú, tæpum fjórum mánuðum síðar, er hann kominn á gott ról. „Þetta hefur verið heldur skjótur bati. Ég byrjaði á því að losna við grindina framan á mjöðminni og mátti þá byrja að labba í vatni, þannig er maður léttari. Svo fékk ég smám saman leyfi til þess að fara í tíu mínútna göngutúr á dag en þá blés auðvitað allt út og bólgnaði svo að þess á milli var ég bara í hjólastólnum. Svo fór ég á hækjurnar en er nú búinn að losna við þær,“ segir Ævar um bataferlið.

Hann segir að allt frá upphafi hafi hann verið staðráðinn í því að ná fullum bata. „Tímaramminn sem læknarnir gefa manni er alltaf rúmur. Þeir reiknuðu með því að ég gæti kannski farið að ganga í haust en mér tókst þetta á fjórum mánuðum, sem er alveg frábært.“

Ævar hefur stundað mótókross af kappi um langt skeið og vill ólmur komast aftur á hjólið. „Mótókross er mjög líkamlega erfið íþrótt en á sama tíma er þetta lífsstíll. Ef maður ætlar að gera þetta af alvöru má maður ekki bara líta á þetta sem áhugamál.“

Kærasta Ævars, Halldís Sævarsdóttir, hefur stutt við bakið á Ævari á meðan hann hefur verið að jafna sig af meiðslunum. „Ég er með stöðuga verki svo ég er kannski ekki alltaf skemmtilegur. Nú ætla ég að bjóða henni í tveggja vikna ferð til Tenerife í þakklætisskyni og við ætlum að taka pínu hálfleik í þessu leiðindaverkefni. Svo tökum við seinni hálfleikinn þegar við komum heim, endurhæfum og styrkjum,“ segir Ævar að lokum.