Álagið gríðarlegt í upphafi

Hjálparstarf Rauði krossinn efndi til hádegisfundar í gær þar sem þrír sendifulltrúar fjölluðu um störf sín á vettvangi á hamfarasvæðunum á Filippseyjum.

Orri Gunnarsson, verkfræðingur, var í hópi fyrstu alþjóðlegu hjálparstarfsmannanna sem voru sendir á vettvang. Hann starfaði í neyðarsveit sem setti upp tjaldsjúkrahús í Basey á eyjunni Samar. Þar gekk fellibylurinn fyrst á land og eyðileggingin var mikil.

Orri dvaldi í sex vikur á Filippseyjum. Aðspurður segir hann að álagið hafi verið gríðarlegt fyrstu tvær vikurnar. „Þá var bæði verið að setja upp sjúkrahúsið og taka á móti sjúklingum. Mestur fjöldi sjúklinganna var að koma fyrstu vikurnar og þá þurftum við að taka á móti um tvö hundruð manns á dag,“ segir hann. „Þetta var mjög mikil vinna í upphafi. Svo jafnaðist það út og varð þægilegra eftir því sem leið á. Ég held að annar og þriðji hópurinn [af hjálparstarfsmönnum] hafi haft það töluvert auðveldara en var hjá okkur í upphafi.“

Hrönn Håkansson, hjúkrunarfræðingur, vann á tjaldheilsugæslustöð við mæðravernd og ungbarnaeftirlit í bænum Balangiga sem einnig er á Samareyju. Hún vann einnig á færanlegri sjúkrastöð sem sinnti heilsugæslu í afskekktum byggðum í nágrenni Balangiga. „Það stendur upp úr hvað þetta fólk var glaðlegt, hjálpsamt, þakklátt og hvað þau voru þægileg og gaman að vinna með,“ segir hún um kynni sín af heimamönnum.

Elín Jónasdóttir, sálfræðingur, starfaði með neyðarsveit Alþjóða Rauða krossins með hópi sérfræðinga sem fengnir voru til að skipuleggja hjálparstarf. Hún skipulagði áfallahjálp og sálrænan stuðning, sérstaklega fyrir starfsfólk og sjálfboðaliða Rauða krossins sem vinna við mjög erfiðar aðstæður. „Það var mikil þörf á sálfrænum stuðningi, það er ekki vafamál, og hann er enn í gangi,“ segir Elín.

Aðrir sendifulltrúar Rauða krossins sem unnu við hjálparstarf á Filippseyjum voru Magna Björk Ólafsdóttir, Lilja Óskarsdóttir, Aleksandar Knezevic og Karl Sæberg Júlísson.

55 milljónir söfnuðust

Alls söfnuðust um 55 milljónir króna í söfnun Rauða krossins á Íslandi vegna hamfaranna. Fyrirtæki lögðu fram um 24 milljónir, þar af komu 22 milljónir króna frá CCP sem framlag spilara tölvuleiksins Eve Online. Utanríkisráðuneytið lagði fram 20 milljónir og almenningur og Félag Filippseyinga Ice-Phil lögðu til 11 milljónir.