Segist ekki geta kosið Sjálfstæðisflokkinn í Garðabæ

Ólafur Örn Nielsen, fyrrum formaður Sambands ungra sjálfstæðismanna (SUS), segist ekki geta kosið Sjálfstæðisflokkinn á meðan Gunnar Einarsson gegnir starfi bæjarstjóra Garðabæjar. „Blekkingar við kynningu á sameiningunni við Álftanes, tugmilljónir til einkavinar fyrir ritun á sögu Garðabæjar eru næg ástæða fyrir því að veita honum ekki brautargengi,“ ritar Ólafur á Facebook síðu sína í kvöld.

Í Fréttablaðinu í dag var greint frá því að fyrirtæki í eigu Ásdísar Höllu Bragadóttur, fyrrverandi bæjarstjóra í Garðabæ, sé í tugmilljóna króna viðskiptum við Garðabæ á ári hverju án þess að útboð hafi farið fram. Fyrirtæki hennar, Sinnum ehf. sinnir heimaþjónustu við aldraða í bænum.

„Það er ekki við Sinnum ehf. að sakast en Gunnar Einarsson hefur sýnt það margítrekað að hann er algjörlega vanhæfur til að gegna starfi bæjarstjóra Garðabæjar,“segir Ólafur og segir brot á útboðsreglum síendurtekin.

Gunnar Einarsson segir málið eiga sér eðlilegar skýringar. Hann segir að þegar fyrst var ákveðið að koma þessu í hendur einkaaðila hafi markaðurinn verið kannaður og í ljós hafi komið að aðeins eitt fyrirtæki sinni málum sem þessum á einkamarkaði. Því hafi verið ákveðið að fara þessa leið. Hann vildi þó ekki fara út í það hvernig bærinn hefði staðið að athugun á fyrirtækjum.

Post by Ólafur Örn Nielsen.