Plastpokinn gott sem útlægur í Hólminum

Nær öll verslunar- og þjónustufyrirtæki í Stykkishólmi hafa hætt notkun plastburðarpoka. Áfanganum var fagnað af stórum hluta bæjarbúa fyrir helgi á sérstakri hátíð þar sem plastpokinn var formlega kvaddur.

Þetta er árangur tilraunaverkefnis Umhverfishóps Stykkishólms sem hefur staðið yfir undanfarna mánuði. Ríflega 95% verslunar- og þjónustufyrirtækja í Stykkishólmi eru þegar hætt að bjóða burðarplastpoka, en verkefninu er þó síður en svo lokið, að sögn aðstandenda. Áfram verður unnið að því að síðustu fyrirtækin, sem ekki hafa treyst sér til að taka lokaskrefið og hætt notkun burðarplastpoka, bætist í hópinn á næstu vikum eða mánuðum.

Spurð um viðtökur meðal bæjarbúa segir Menja von Schmalensee, formaður Umhverfishóps Stykkishólms, að verkefninu verði fylgt eftir með haustinu og lögð ánægjukönnun fyrir íbúa og verslunarrekendur með það að markmiði að kanna hvernig fólki hugnast breytingin. „Almennt séð hafa viðbrögðin verið mjög góð, þótt líka hafi heyrst efasemdarraddir en þær eru í miklum minnihluta,“ segir Menja sem bætir við að í vetur verði skrifuð skýrsla um reynsluna og hvað gekk vel og hvað illa. „Reynsla okkar ætti svo að geta auðveldað öðrum samfélögum að gera eitthvað sambærilegt. Frumkvæðið að því þarf þó líklega að koma frá íbúum, verslunum eða sveitarstjórnum. Fjölmargir hafa spurt okkur út í lausnir, t.d. varðandi poka undir almennt sorp, sent okkur hvatningu og óskað þess að í sínu samfélagi væri sambærilegt verkefni í gangi. Menja bætir við:

„Það er mjög vaxandi hreyfing fólks víða um heim sem hugsar á svipuðum nótum og við og víða hefur burðarplastpokanotkun lengi verið mun minni en hér á landi. Enn sem komið er eru þó mjög fáar borgir og bæir langt komin í því að losna alveg við burðarplastpokann og ég held að fá samfélög hafi komist jafn langt og við án þess að beita boðum og bönnum.“

Þegar hafa fyrirtæki í Stykkishólmi sett upp þar til gerðar merkingar um að þau hafi sagt skilið við plastburðarpokann. Verkefni Umhverfishóps Stykkishólms um burðarplastpokalaust sveitarfélag er unnið í samvinnu við Náttúrustofu Vesturlands, Landvernd og UMÍS.