Hefur verulegar áhyggjur af ýsustofninum

Forstjóri Hafrannsóknastofnunar hefur verulegar áhyggjur af ýsustofninum og leggur til að aflahámark lækki um tæp átta þúsund tonn á næsta fiskveiðiári. Aflahámark á þorski hækkar nokkuð minna en vonast var til.

Tíðindi dagsins þykja nokkur vonbrigði fyrir hagsmunaaðila í sjávarútvegi sem höfðu vonast eftir því að aflaráðgjöf yrði aukin í mörgum tegundum. Áhyggjur flestra beinast að ýsustofninum sem hefur hríðlækkað á síðustu árum. Fiskveiðiárið 2008/2009 var ýsuaflinn alls 111 þúsund tonn en verður tæplega fjórfalt minni á næsta fiskveiðiári.

„Þegar 2007 árangurinn, sem er síðasti bragglegi árangurinn, verður uppurinn þá er fyrirsjáanlegt að aflinn muni minnka verulega nema að það komi til sterkir árgangar,“ segir Jóhann Sigurjónsson, forstjóri Hafrannsóknastofnunar.

Aflaráðgjöf Hafró gefur til kynna að aflahámark á þorski aukist um þrjú þúsund tonn á milli ára. Vonir stóðu til að nokkur aukning yrði í þorskstofninum en Jóhann segir stofninn ekki hafa styrkst nóg á milli ára. Lagt er til að veiði á þorski verði 218 þúsund tonn á næsta fiskveiðiári.

„Við gerðum ráð fyrir aðeins meiri aukningu, kannski 10 þúsund tonna meiri aukningu en raunin varð og það helgast af því að við metum það svo að meðalþyngdir á árinu 2014 eru heldur lægri en við gerðum ráð fyrir og voru í fyrra.“

Loðnuaflinn gæti margfaldast

Aflaráðgjöf á grálúðu eykst talsvert á milli ára og verður 25 þúsund tonn á næsta fiskveiðiári. Jafnframt er búist við því að loðnustofninn taki við sér en nýliðin loðnuvertíð var eins sú versta í ára raðir. Aflaráðgjöf er 225 þúsund tonn fyrir næsta fiskveiðiár en Jóhann telur að hægt verði að veiða tvöfalt meira en það.

„Nú þegar gerum við ráð fyrir því að vertíðin á næsta ári geti verið eitthvað í kringum 450 þúsund tonn. Það er þó háð því að við staðfestum það með mælingum á komandi vetri. Þetta er auðvitað mjög mikilvægt, ekki bara fyrir loðnuveiðarnar því þetta er líka vísbending um það að það verði meira fæðuframboð fyrir okkar nytjafiska. Loðna er ein mikilvægasta fæða þorks og fleiri nytjastofna,“ segir Jóhann Sigurjónsson, forstjóri Hafrannsóknastofnunar.