Skiptar skoðanir á veiðigjöldum

Katrín Jakobsdóttir, þingmaður Vinstri grænna, undrast að lækkun veiðigjalda sé í forgangi hjá ríkisstjórninni. Hún telur að grípa þurfi til aðgerða útaf væntanlegum tekjumissi til að ná markmiðum um hallalaus fjárlög.

„Mig langar að rifja upp fjárlagaumræðu  sem var hér fyrir ekki svo mörgum mánuðum þar sem hækkaðar voru álögur á námsmenn til þess að ná markmiðum um hallalaus fjárlög. “ Hún nefnir hækkun komugjalda sem námu um 90 milljónum króna, álögur á námsmenn upp á 180 milljónir og 40 milljón króna niðurskurð á þróunaraðstoð. Hún minnist á orð Illuga Gunnarssonar, mennta- og menningamálaráðherra, þar sem hann sagði að ekki þurfi að bregðast við fyrirsjáanlegu tekjutapi ríkissjóðs vegna lægri veiðigjalda.

„Telur hæstvirtur ráðherra það virkilega ekki eftirsóknarvert markmið að auka hér jöfnuð, og er ekki kominn tími til að ríkisstjórnin beiti aðgerðum sínum í þá veru í stað þess að auka hér misskiptingu?“ sagði Katrín í óundirbúnum fyrirspurnartíma á Alþingi í dag og beindi orðum sínum til fjármála- og efnahagsráðherra.

Bjarni Benediktsson segir nauðsynlegt að lækka veiðigjöldin, afkoma í greininni sé að versna og verð á erlendum markaði annað.  Hann segir að með því að taka fjárfestingu frá útgerðinni sé í raun verið að fara þrjátíu ár aftur í tímann.

„Við endum aftur með ríkisstyrktan búskap í sjávarútvegi á Íslandi og lengi var áður og frá þessu þarf að hverfa.“

„Umræðan prinsipplaus“

Frumvarp ríkisstjórnarinnar um breytingu á veiðigjöld var kynnt í síðustu viku. Veiðigjöldin koma til með að skila átta milljörðum í ríkissjóð.  Þrjú af stærstu sjávarútvegsfyrirtækjum landsins sýndu hagnað upp á 25 milljarða króna árið 2012, sem var metár í sjávarútvegi, en skiptar skoðanir eru á því hvort fyrirhuguð veiðigjöld séu of há eða lág.

„Vandinn við vinstri flokkana þegar kemur að umræðu um veiðigjöld er að þeir líta á afkomu útgerðarinnar sem einhverja skúffu, einhvern pott sem hægt er að ganga í og skammta sér af,“ sagði Bjarni og segir umræðu af hálfu vinstri flokka prinsipplausa.

Umfangsmikið verkefni framundan

Áætlað er að veiðigjöld nemi 9,5 milljörðum króna á næsta fiskveiðiári, án tillits til frádráttarliða, og að gefnum forsendum um að heildaraflamagn verði um fimm hundruð og fimmtán þúsund þorskígildi. 

„Á þetta að vera þannig að menn ætla bara að skammta sér einhverri hlutdeild af hverju úthlutuðu þorskígildistonni alveg óháð því hvað er að  koma út úr rekstri útgerðarinnar? Og segja: „þetta eigum við útaf því að við ætlum að nota það í hin ýmsu samfélagslegu verkefni.“

Umfangsmikið verkefni bíður þingmanna, fáir dagar eftir og málið sjálft umfangsmikið. Líkur eru á að kallað verði til sumarþings takist ekki að afgreiða frumvarpið á þeim dögum sem eftir eru.