Spyr hvenær von sé á aðgerðum til að jafna húshitunarkostnað

Ásmundur Einar Daðason, þingmaður Framsóknar og aðstoðarmaður forsætisráðherra, hefur beint fyrirspurn til Ragnheiðar Elínar Árnadóttur, iðnaðar- og viðskiptaráðherra, um hvenær vænta megi ráðstafana sem miði að því að jafna húshitunarkostnað að fullu á milli landsvæða.

Talsverður munur getur verið á húshitunarkostnaði og hefur málið lengi verið til umræðu. Um tíu prósent landsmanna hafa ekki aðgang að jarðhita til að hita upp húsin sín og þurfa að treysta á raforku eða jafnvel olíu til þess. 

Málið rataði inn í stefnuyfirlýsingu ríkisstjórnarinnar, þar sem segir: „Unnið verður að jöfnun raforku- og húshitunarkostnaðar.“

Ásmundur Einar var fyrsti flutningsmaður að þingsályktunartillögu sem lögð var fram um málið á síðasta kjörtímabili. Fjórir aðrir þingmenn, þar af tveir núverandi ráðherrar, voru meðflutningsmenn að tillögunni.