Nýir lúxusbílar fyrir ráðherrana

Gengið hefur verið frá kaupum á nýjum ráðherrabílum fyrir utanríkis- og fjármálaráðherra. Sá fyrrnefndi hefur þegar verið afhentur Gunnari Braga Sveinsson en um er að ræða Land Rover Discovery jeppa. Þá hefur Mercedes-Benz E-Class verið pantaður fyrir Bjarna Benediktsson. Viðskiptablaðið greinir frá. Jeppinn er af gerðinni Discovery SE og kostar 13 milljónir króna samkvæmt verðlista söluaðilans BL.

Þýska farartækið sem Bjarni fær í sínar hendur kostar frá sjö milljónum króna og upp úr samkvæmt verðlista Bílaumboðsins Öskju. Fær Bjarni bílinn afhentan um áramótin en ráðherrabíll hans, BMW5, hefur verið á verkstæði að undanförnu.

Þá ku forsætisráðuneytið hafa augastað á tveimur bílum fyrir forsætisráðherrann Sigmund Davíð Gunnlaugsson. Stendur valið á milli BMW7--línunnar og Mercedes-Benz S-Class. Er verð þeirrar bíltegundar í kringum 20 milljónir króna. Ákvörðun um nýjan bíl Sigmundar verður tekin á næstu dögum samkvæmt upplýsingum Viðskiptablaðsins en tekið er fram að útboð hafi staðið yfir í samráði við Ríkiskaup. Því má ætla að ráðuneytin fái einhvern afslátt af kaupum sínum.