Veruleg aukning í sölu á lúxusbílum

Mikil aukning hefur verið í sölu á lúxusbílum í ár, sé miðað við síðustu ár. Bílar sem eru að minnsta kosti tíu milljónir króna að virði hafa selst mjög vel það sem af er ári og hafa sumar tegundir nú þegar selst tvöfalt betur en í fyrra.

Þetta kemur fram í tölum frá Samgöngustofu. Til dæmis hefur sala á bílum af tegundinni Porsche aukist um 150 prósent. Sala á Range Rover og Land Rover jeppum hefur aukist um 86,6 prósent. Mercedez Benz bifreiðar hafa einnig selst mun betur en í fyrra, en aukningin á sölu bíla af þeirri tegund er um 71 prósent.

Margra ára endurnýjunarþörf

Bílasalar telja að kaupendur fái nú útrás fyrir margra ára endurnýjunarþörf, en sala á nýjum bílum dróst saman eftir hrunið í október 2008. Í fyrra þótti salan á nýjum bifreiðum nokkuð góð, miðað við árin þar á undan. En í ár hefur salan aukist enn meira, eins og sjá má á sölutölum nokkurra vinsælustu tegundanna.

Range Rover jeppar hafa selst vel, en auk þeirra hafa Mercedez Benz ML jeppar selst vel auk Porsche Cayenne þykja hafa rokið út. Sala á Volvo-bifreiðum hefur aukist um tæp 65 prósent og eru Volvo V60 gríðarlega vinsælir. Jepplingarnir frá BMW hafa einnig selst vel, bæði BMW x3 og BMW x5.

Svipað og í upphafi góðærisins

Hér að ofan má sjá línurit yfir sölu Land Rover og Range Rover jeppa. Þeir eru flokkaðir saman í tölum Samgöngustofu. Jeppar af tegundinni Land Rover Discovery hafa selst gríðar vel að undanförnu, ekki síður en Range Rover jeppar, samkvæmt heimildum Vísis. Alls hafa 125 bílar bílar í þessum flokki selst í ár, en í fyrra seldust 67 eintök. Eins og sjá má var mesta salan á bílum í þessum flokki árið 2007, en þá voru 348 bílar nýskráðir.

Sala á nýjum bílum er talsvert meiri nú en í fyrra. Nú þegar hafa selst 31,3 prósent meira af nýjum bílum miðað við allt árið í fyrra. Tæplega níu þúsund nýir bílar hafa selst í ár og hefur þeim fjölgað um tæplega 2100.