Rithöfundar fordæma ríkisstjórnina

Hækkun virðisaukaskatts eru gríðarleg vonbrigði, að sögn formanns Félags íslenskra bókaútgefenda.

Í hádeginu í dag voru á Alþingi samþykktar breytingar á virðisaukaskatti,  neðra þrepið hækkar úr sjö í ellefu prósent. Þetta þýðir að hækkun skatts á mat og bækur. Stjórnarþingmenn 35 að tölu greiddu atkvæði með hækkuninni. Rithöfundar, útgefendur og aðrir vinir bókarinnar mættu á þingpalla í dag og fylgdust með atkvæðagreiðslunni og mótmæltu. Afar þungt er í þeim hljóðið.

Ríkisstjórnin slær heimsmet í ömurleika

Egill Örn Jóhannsson er formaður Félags íslenskra bókaútgefenda og hann segir þetta gríðarleg vonbrigði og sjaldan hefur hefur hann verið eins ómyrkur í máli og nú: „Illugi Gunnarsson og vinur hans Bjarni Benediktsson, ásamt Elínu Hirst og fleirum að hækka skatta á íslenska bókaútgáfu, í nafni einföldunar? Það var vond ákvörðun. Ég gat ekki einu sinni ímyndað mér að þessi ríkisstjórn yrði jafn vond og hún svo er. Hún slær heimsmet í ömurleika sínum. Já, Illugi Gunnarsson, takk fyrir mótvægisaðgerðirnar!“

Egill Örn segir þetta sér gríðarleg vonbrigði. „Að verða fyrir aðför ríkisstjórnarinnar, sem vill kenna sig við þjóðmenningu og annað í þeim dúr, að íslenskri bókaútgáfu. Við höfum á undanförnum vikum kynnt fyrir stjórnarflokkunum ítarlega þá alvarlegu stöðu sem er í bransanum, en því miður fyrir daufum eyrum, þrátt fyrir að allir þykist skilja vandann þegar við þá er rætt. Ég hef fundað með ráðherrum, þingmönnum, aðstoðarmönnum og fleirum vegna þessara mála og allir hafa þóst skilja vandann og viljað breyta því sem fyrir lá. Það reyndist allt aum lygi þegar upp var staðið.“

Verð á bókum mun hækka verulega

Egill segir ekki liggja nákvæmlega fyrir hvað þetta hafi í för með sér, hvort þetta sé ávísun á gjaldþrot innan fagsins?

„Það er ómögulegt að segja til um hvaða áhrif þetta hefur, en það er morgunljóst að verð á bókum mun hækka enda mun töluvert meira renna til ríkisins en áður í kjölfar virðisaukaskattshækkunarinnar. Vonandi tekst bransanum að mæta þessu og vonandi verður ekki samdráttur í sölu bóka, en reynslan erlendis frá er ekki uppörvandi þar sem virðisaukaskattshækkanir hafa orðið á bókum. Nýleg dæmi erlendis frá eru því miður þannig að bóksala hefur hrunið í kjölfar hækkunar á virðisaukaskatti. Ég vona innilega að það verði ekki raunin hér á landi.“