Kirkjuheimsóknir erfiðar fyrir börn sem fara ekki með

Óánægðir foreldra hafa kvartað yfir kirkjuheimsóknum skólabarna fyrir jólin til skóla- og frístundaráðs Reykjavíkurborgar. Formaður ráðsins segir foreldra oft eiga erfitt með að útskýra fyrir ungum börnum af hverju þau fá ekki að fara með.

Í næstu viku ætla margir skólar á höfuðborgarsvæðinu að fara með nemendur sínar í kirkjuferðir í tilefni af jólunum. Ekki eru allir sáttir við þetta og telja sumir að þetta geti brotið í bága við samskiptareglur við trúfélög sem borgin hefur sett sér.

„Það er ekki brot á reglum borgarinnar að börn fari í heimsóknir í kirkjur. En hins vegur verður það að viðurkennast að það getur verið á dálítið gráu svæði hvort að um er að ræða einhvers konar innrætingu í þessum heimsóknum eða ekki. Það er óheimilt samkvæmt reglunum og heimsóknirnar eiga að fara fram undir handleiðslu kennara og vera í raun og veru hluti af fræðslu um trúmál,“ segir Skúli Helgason, formaður skóla- og frístundaráðs Reykjavíkurborgar.

Hann segir nokkuð um að foreldrar hafi haft samband við ráðið vegna kirkjuheimsókna.

„Það er talsvert um það. Það eru ekki síst foreldrar á leikskólunum sem hafa haft samband við mig og okkur í ráðinu og lýst yfir óánægju sinni með þessi atriði að börn þeirra, sem eru eðlilega spennt fyrir því, eins og öll börn eru, að fá að fara með hópnum í vettvangsferðir af öllu tagi. Þau eiga erfitt með að skilja af hverju þarna er verið að fara inn í kirkjurnar og það sé ósk foreldra þeirra jafnvel að þau fari ekki með. Þetta er skiljanlegt frá sjónarhóli foreldranna, þetta snýst um grundvallarlífsafstöðu. En eðlilega erfitt að útskýra fyrir barninu sínu að það gildi eitthvað annað um það en önnur börn. Ég held að við þurfum öll sameiginlega, um leið og við berum virðingu fyrir skoðunum hvers annars, að velta fyrir okkur hvernig við getum búið þannig um hnútana að þessi börn finni ekki fyrir mismunun eða upplifi það að þeim sé útskúfað úr hópi félaga sinna.“