Virðist hafa farið betur en á horfðist

„Við eigum eftir að skoða betur tjónið, en ég held að það sé óhætt að segja að miðað við nóttina virðist þetta hafa farið betur en á horfði,“ segir Halldór Guðmundsson, forstjóri Hörpu, í samtali við Vísi. Aðilar frá tryggingafélagi Hörpu er nú á vettvangi til að meta tjónið vegna vatnsleka sem var þar í nótt.

„Það fór mikið vatn og lak úr loftræstiklefa á fjórðu hæð, fyrir ofan Silfurberg. Það lak þar niður töluvert vatn.“ Þá lak vatn ekki inn í aðra sali Hörpu. Forsvarsmenn Hörpu munu funda innan skamms og fara yfir stöðuna.

Viðvörunarkerfi í tónleika- og ráðstefnuhúsinu Hörpu gáfu til kynna að þar væri vatn farið að leka um klukkan hálf fjögur í nótt. Þegar fyrstu slökkviliðsmenn komu á vettvang skömmu síðar kom í ljós að vatn hafði flætt um nokkur hundruð fermetra svæði á fjórðu hæð yfir salnum.