Venni Páer grunaður um mansal

Verharð Þorleifsson fasteignasali, sem meðal annars er þekktur sem skemmtikrafturinn Venni Páer og fyrrum júdókappi, komst að því fyrir tilviljun að nafn hans er skráð í skýrslur vegna mansalsmála. Hann heldur að það hljóti að vera vegna þess að hann hefur verið að aðstoða vinkonu sína frá Erítreu við að öðlast ríkisborgararétt.

„Við sem höfum reynt að aðstoða hana höfum einnig fengið að finna nasaþefinn af því mótlæti sem hún hefur þurft að takast á við. Ég fékk til dæmis að vita það óvart, að ég sætti lögreglurannsókn vegna mansals, þegar ég var að endurnýja skotvopnaleyfi mitt hjá Sýslumanni. Ég endurtek, vegna mansals!“ segir Vernharð hneykslaður.

Hann segist aldrei hafa verið upplýstur um þessa rannsókn né heyrt um hana fyrr né síðar. „Aldrei boðaður í skýrslutöku né sent bréf þess efnis að ég liggi undir grun um eitthvað slíkt. Ég fékk bara óvart að vita að ég hafi verið rannsakaður og lá undir grun því hún hafði nefnt mig og konuna mína sem vini sína. Það er skrítin tilfinning. Reyndar alveg absúrd,“ segir Vernharð.

„Það er bara þetta mansalsmál“

Það eru um tvö ár síðan Vernharð komst að þessu en leysir frá skjóðunni nú í tilefni þess að vinkona hennar er loks komin með ríkisborgararétt eftir langa og stranga baráttu sem Vernharð segir varla hægt að leggja á nokkurn mann. Nema, hann var hjá Sýslumanni í mesta sakleysi að endurnýja skotveiðileyfi sitt. Allt í einu kom hik á þann sem afgreiðir Vernharð. „Og hann segir að það sé þarna mál á mig. Menn þurfa að vera með hreint sakavottorð til að fá byssuleyfi. Sem ég hélt að væri, algerlega, enda alinn upp af ömmu minni, en það kemur skrítinn svipur á hann og hann segir: „Það er bara þetta mansalsmál.“

Vernharð segist ekki hafa vitað hvaðan á sig stóð veðrið. „Ég stóð og gapti. Af hverju veit ég ekki af þessu? Um hvað snýst þetta?“

Umsækjendur um ríkisborgararétt sem glæpamenn

Vernharð segir það eina sem til greina komin tengist vinkonu sinni. „Það í rauninni, eina sem kom til greina var þetta sem var í kringum hana, og þessa umsókn hennar; þetta fólk er sent í skýrslutökur og yfirheyrslur og það meðhöndlað sem glæpamenn finnst manni, þeim okkur sem stöndum við hlið þeirra eða erum hinum megin borðsins. Vinir meintra glæpamanna eru glæpamenn líka.

Vernharð hefur ekkert grennslast fyrir um þetta frekar en gerir ráð fyrir því að þetta sé á varnalegri skýrslu um sig. „Kaldhæðnasta í þessu öllu er að manneskjan sem um ræðir er uppskrift að heilli og góðri manneskju. Mjög furðulegt allt saman. Ef fólk almennt er látið ganga í gegnum þetta skilur maður að fjöldinn sé ekki hár sem kemst í gegnum þetta; þú þarft að hafa stöðuga lögfræðiaðstoð.“