Það helliringdi inni í Silfurbergi

Það helliringdi inni í öðrum stærsta sal Hörpu þegar forstjóri hússins kom þangað í nótt eftir að leki kom á loftræstikerfi húsins. Forstjórinn vonar að skemmdir vegna lekans reynist minni en útlit var fyrir í fyrstu.

Viðvörunarkerfi vegna leka fór í gang í Hörpu upp úr klukkan þrjú í nótt og kom slökkvilið fljótlega á staðinn og hófst handa við að stöðva lekann.

Þegar fréttastofu bar að garði í Hörpu síðdegis í dag voru menn í óðaönn að þurrka Silfurberg eftir atburði næturinnar. En útlitið var ekki gott þegar forstjórinn kom í húsið að verða klukkan fjögur í nótt.

„Okkur leist nú ekki mjög vel á að koma hérna í nótt. Það hafði farið element í loftræstiherbergi sem beint fyrir ofan Silfurberg. Þannig að það fossringdi hér inni í salnum og við vissum heldur ekki hvert vatnið hafði farið eða hvernig það hafði dreift sér. Svo getum við sagt að það hafi farið betur en á horfðist,“ sagði Halldór Guðmundsson forstjóri Hörpu síðdegis.

Slökkviliðið hafi mætt og þurrkað upp vatnið af miklu kappi og þurrkarar hafa verið í gangi í salnum í allan dag. Ef ekki hefði verið vegna veðursins í Reykjavík í dag hefðu fyrirhugaðir tónleikar getað farið fram í Silfurbergi í kvöld.

En það er nú kannski ekki besta útsýnið sem forstjóri svona húss fær þegar hann kemur inn í þennan annan stærsta sal Hörpu?

„Nei, okkur leist auðvitað ekkert á blikuna því þetta eru gríðarleg loftræstikerfi og þegar element gefur sig í því getur það haft alvarlegar afleiðingar. Þannig að nú erum við að fara yfir það með okkar tæknimönnum hvað nákvæmlega gerðist og hvernig hægt er að koma í veg fyrir að það gerist aftur,“ segir Halldór.

Enn eigi eftir að meta endanlegt tjón með fulltrúum tryggingarfélaga en hins vegar sé útlit fyrir að það verði minna en talið var fyrir í fyrstu.

„En auðvitað þarf kannski einhverja daga til að það komi alveg í ljós hvað hefur gerst. En okkur sýnist að það sé búið að komast fyrir þetta og við séum eiginlega bara að þurrka og gera klárt. Því það er mikið um að vera hér í húsinu í desember,“ segir Halldór Guðmundsson.