Fjármálastjóri í framhaldsskóla dæmdur fyrir fjárdrátt

Kona sem starfaði sem fjármálastjóri og bókari hjá Verkmenntaskólanum á Akureyri hefur verið dæmd fyrir að draga sér rúmar 26,4 milljónir króna á árunum 2005 til 2013. Konan millifærði af reikningi skólans inn á sinn eigin reikning í samtals 138 skipti.

Konan var sakfelld fyrir fjárdrátt og dæmd í 15 mánaða fangelsi en þar af eru tólf mánuðir bundnir skilorði. Hún var einnig dæmd til að endurgreiða skólanum upphæðirnar auk dráttarvaxta, málskostnað og málsvarnarþóknun skipaðs verjanda síns.

Í dómi Héraðsdóms Norðurlands eystra kemur fram að konan hafi játað brotið skýlaust fyrir dómi. Hún er fædd árið 1961 og hefur ekki áður verið dæmd til refsingar. Var sérstaklega litið til þess þegar refsing var ákveðin.