Hart sótt að Framsókn vegna matarskatts

Þingmenn ræddu tekjuöflunarfrumvörp ríkisstjórnarinnar langt fram á kvöld í gær. Stjórnarandstaðan gagnrýndi harðlega hækkun á neðra þrepi virðisaukaskatts og þá sérstaklega að þingmenn Framsóknarflokksins skuli hafa látið af andstöðu sinni við hækkun skattsins á matvæli.

Til stóð að ljúka umræðum um tekjuöflunarfrumvörp ríkisstjórnarinnar á Alþingi í gær og hefja síðan aðra umræðu um fjárlög. Þingmenn höfðu hins vegar mikið að segja um tekjuöflunarfrumvörpin og þá sérstaklega breytingarnar á virðisaukaskattlögunum sem fela í sér hækkun neðra þrepsins úr 7 prósentum í 11 og lækkun efra þrepsins úr 25,5 prósentum í 24 prósent.

Sigríður Ingibjörg Ingadóttir þingmaður Samfylkingarinnar minnti á að Framsóknarflokkurinn hafi eindregið lagst gegn áætlunum fjármálaráðherra um að hækka virðisaukaskatt á matvæli í 12 prósent. Lilja Rafney Magnúsdóttir þingmaður Vinstri grænna tók í svipaðan streng.

„Hæstvirtur forsætisráðherra hafði uppi stór orð á síðasta kjörtímabili um að aldrei kæmi til greina að hans hálfu að hækka matarskattinn svo kallaða. Þess vegna er það ekki skrýtið að maður furði sig á þessum viðsnúningi hjá Framsóknarflokknum  og að hann láti sér nægja eitt prósent lækkun frá því sem áætlað var að hækka matarskattinn upp í 12 prósent,“ sagði Lilja Rafney.

Hún teldi að þessi ráðstöfun ætti eftir að valda ólgu og reiði í þjóðfélaginu og gera kjarasamninga erfiðari. Þá vakti hún athygli á því að sala og leiga á fiskveiðiheimildum væri undanþegin virðisaukaskatti.

„Sú hugmynd sem háttvirtur þingmaður varpaði hér fram um að setja virðisaukaskatt á sölu kvóta og leigu á kvóta, er hreint út sagt stórkostlegasta hugmynd  ekki bara kvöldsins heldur síðustu mánaða. Ég tel að þetta sé ákaflega skarplega athugað hjá háttvirtum þingmanni,“  sagði Össur Skarphéðinsson þingmaður Samfylkingarinnar. Með þessari aðgerð mætti að minnsta kosti draga úr hækkun neðra þrepsins.

Pétur H. Blöndal þingmaður Sjálfstæðisflokksins sagði vandamálið með að ná samstöðu á Alþingi að frumvörðin kæmu utanfrá inn í þingið. Hann hefði marg sinnis lagt til að nefndir þingsins semdu lagafrumvörpin.

„Þá væru allir nefndarmenn inni í málinu og mundu t.d. skilja það af hverju ég vil fá 12 prósent virðisaukaskatt á mat en ekki 11 prósent. Af hverju vil ég það? Af því að þá minkar bilið (milli skattþrepa) og þá minka möguleikarnir til að hagræða og svindla. Þannig að það er ákveðin hugsun í þessu frumvarpi sem við erum að ræða og hún er ekki alveg út í bláinn.Alls ekki,“ sagði Pétur H. Blöndal á Alþingi í gærkvöldi.