Sendi jólakort með mynd af kókflöskum í stað fjölskyldumeðlima

Arna Ósk Harðardóttir, bóndi á Hornafirði, brá á það að ráð að taka „fjölskyldumynd“ af kókflöskum með nöfnum allra fjölskyldumeðlima eftir að hafa mistekist að koma þeim öllum saman í jólamyndatöku síðustu tvö ár.

Börnin þrjú og tengdabörnin búa í ólíkum landshlutum og koma sjaldnast öll saman nema á sjálfum jólunum, en þá er að sjálfsögðu orðið of seint að taka mynd.

Arna Ósk byrjaði í vor að kaupa kókflöskur með nöfnum fjölskyldumeðlimanna átta. Arna Ósk keypti þær flestar á Hornafirði en einhverjar á Reyðarfirði og í Reykjavík. Hún segist hafa þurft að umstafla dálítið í búðunum til að leita að réttu flöskunum og hafi oft farið í fýluferðir. „Fólk hefur eflaust haldið að ég væri starfsmaður í þessum verslunum. Ég reyndi að gramsa þegar enginn var nálægt mér en ég gerði það helst þegar ég var stödd í Reykjavík þar sem enginn þekkti mig og þar sem ég kippti mér ekki upp við ef ég var litin hornauga fyrir að róta í goskælinum.“

Fyrstu flöskuna keypti Arna Ósk í maí en þá síðustu í október. „Þegar ég var komin með allar flöskurnar hugsaði ég, hvað á ég að gera við þetta? Þá fékk ég hugmyndina að því að stilla flöskunum upp í myndatöku. Við fjölskyldan hittumst eiginlega aldrei, við erum svo mörg og búum í ólíkum landshlutum og mig hefur í dálítinn tíma langað að senda fjölskyldumynd með jólakortunum. Ég hringdi í son minn í Reykjavík og bar hugmyndina undir hann og honum fannst hún frábær. Svo var myndin tekin í byrjun nóvember í Húsafelli,“ segir Arna Ósk.

Arna Ósk sendi starfsmönnum Vífilfells póst um þessa óhefðbundnu leið sem hún fór við fjölskyldumyndatökuna og ákváðu þeir í kjölfarið að senda henni smá jólaglaðning fyrir hugmyndina.

Arna Ósk fékk gjöfina afhenta nýverið og sagði við það tilefni að hún hefði ekki verið að vonast eftir neinu slíku heldur vildi hún einfaldlega sýna hvernig hægt væri að nota nafnmerktar kókflöskur með skemmtilegum hætti.

.