Bjarni segir Ólöfu njóta óskoraðs trausts

Formaður Sjálfstæðisflokksins segir að það hafi verið vandasöm ákvörðun að velja Ólöfu Nordal í embætti innanríkisráðherra. Ólöf njóti hins vegar óskoraðs trausts sjálfstæðismanna. Einar K. Guðfinnsson forseti Alþingis hafnaði boði um að taka við innanríkisráðuneytinu.

Þingflokkur Sjálfstæðisflokksins kom saman til fundar í Valhöll rétt fyrir klukkan tíu í morgun þar sem margir hafa sjálfsagt setið með ráðherra í maganum. En skömmu eftir að fundurinn hófst kom Bjarni Benedikstsson út af fundinum og greindi frá því að hann hefði valið Ólöfu Norðdal til að taka við innanríkisráðuneytinu og dómsmálunum af Hönnu Birnu Kristjánsdóttur og Sigmundi Davíð Gunnlaugssyni.

„Þetta er vandasöm ákvörðun sem ég stóð frami fyrir. Fyrst og fremst vildi ég fá einstakling sem nyti óskoraðs trausts okkar sjálfstæðismanna. Ég lít á hana sem eina af okkur enda var hún á þingi með okkur allt fram á síðasta ár. Hún hefur reynslu úr ráðuneytinu. Hún er lögfræðimenntuð,” segir Bjarni.

Val hans á Ólöfu þýði þó ekki að hann hafi ekki treyst ýmsum þingmönnum flokksins til að verða ráðherra. Hann hafi til að mynda rætt þau mál við Einar K. Guðfinnsson forseta Alþingis sama dag og það lá fyrir að Hanna Birna ætlaði að segja af sér.

„Við höfum í millitíðinni átt nokkur samtöl síðast í gær. Niðurstaðan er sú að hann óskar ekki eftir því að gerðar séu breytingar á hans stöðu. Ég var þá ekkert að þrýsta frekar á um það og geri þess vegan þessa tillögu,” segir Bjarni.

„Þetta var auðvitað mjög freistandi fyrir mig að takast á við þetta nýja verkefni en það var niðurstaða mín að ég vildi frekar gegna þessu starfi sem ég hef verið að gegna núna í rúmt eitt ár. Ég tel að þetta sé mesta virðingarstaða sem einum þingmanni getur hlotnast, að vera æðsti yfirmaður sjálfrar löggjafarsamkomu þjóðarinnar,” sagði Einar eftir þingflokksfundinn.

En hann var ráðherra sjávarútvegs og lándbúnaðar á árunum 2005 til 2009.

„Ég var ekki búinn að fá nóg sem sést á því að ég vildi gjarnan verða ráðherra í upphafi kjörtímabilsins. Þá varð niðurstaðan önnur og ég er mjög þakklátur fyrir það og ég er mjög ánægður með að það skyldi verða niðurstaðan á þeim tíma, núna þegar ég horfi til baka,“ segir Einar K. Guðfinnsson.