Týndir lambaskrokkar frá SS á Selfossi

„Ég harma og biðst velvirðingar á því að mistök hafi átt sér stað,“ segir Guðmundur Svavarsson, framleiðslustjóri Sláturfélags Suðurlands (SS) þegar leitað var viðbragða hjá honum vegna nokkra týndra lambskrokka frá sauðfjárbónda í Grímsnesi. „Ég hef ekki fengið þetta tiltekna mál eða önnur sambærileg inn á borð til mín í haust enda eru þau alla jafna leyst á staðnum komi þau upp. 

Málavextir eru þeir að sauðfjárbúið á Klausturhólum í Grímsnes- og Grafningshreppi setti lömb í sláturhúsið á Selfossi 22. september í haust og ætluðu að taka sex skrokka heim. Þá kom í ljós að allir skrokkarnir voru týndir og fengu þau því skrokka frá öðrum, sem voru sagðir frítt vegna mistakana. 

Guðmundur segir ferlið flókið og erfitt sé að koma í veg fyrir mistök. „Þetta heimtökuferli er býsna flókið, með mörgum snertipunktum innanhúss og utan og erfitt að koma 100 prósent í veg fyrir mistök.  Samhliða vexti í heimtöku höfum við leitast við að bæta ferla og aðstöðu, enda viljum við hafa þessa hluti í sem allra bestu lagi.  Því er gott að fá ábendingar um það sem miður fer til að geta gert enn betur,“ segir hann.

Bóndinn furðar sig á þessu. „Mér finnst skrítið hvernig þetta er hægt þar sem að skrokkarnir eru merktir með nafni bóndans og á miðanum stendur líka að þetta sé heimtekið. Ég er heldur ekki sátt við það  að fá kjöt frá öðrum þegar maður vill sitt eigið kjöt“, segir Antonía Helga Guðmundsdóttir, sauðfjárbóndi á Klausturhólum  þar sem eru um þrjúhundruð fjár.

Þetta er ekki í fyrsta skipti sem skrokkar frá Klausturhólum týnast. „Það er rétt, við höfum  einnig lent í því að þeir týni sauðaskrokkum frá okkur oftar en einu sinni en við tökum þá alla heim þar sem að við fáum lítið fyrir þá og okkur finnst best sauðahangikjöt,“ segir Antonía Helga.

„Nýlegt dæmi um týndan sauð var núna um daginn þegar það var slátrað 26. nóvember.  Þá ætlaði vinkona mín að fá skrokkinn og fór því í SS til að sækja hann, nei, þá voru þeir búnir að týna honum. Hún spurði þá hvað þeir ætluðu þá að gera og þeir sögðust ekkert geta gert annað en að láta hana hafa annan skrokk, sem væri þá ekki sauður“, segir hún.