Tvítugur Vestmannaeyingur ákærður fyrir peningafals

Ríkissaksóknari hefur ákært tvítugan mann í Vestmannaeyjum fyrir þjófnað og peningafals. Honum er gert að sök að hafa brotist inn í veitingastaðinn Lundann í apríl í fyrra, stolið þaðan listaverki með fölsuðum peningaseðlum og komið hluta þeirra í umferð.

Um er að ræða nítján fimm þúsund króna seðla og tvo fimm hundruð krónu seðla, sem allir eru ljósritaðir. Ákærði á að hafa afhent tveimur vinum á sama aldri hluta seðlanna og notað hluta þeirra sem gjaldmiðil í nokkrum verslunum í Vestmannaeyjabæ, vitandi það að þeir væru falsaðir.

Sakamál verður höfðað gegn manninum fyrir Héraðsdómi Suðurlands. Saksóknari krefst þess að ákærði verði dæmdur til refsingar og til greiðslu alls sakarkostnaðar, en samkvæmt almennum hegningarlögum skal hver sá sem lætur út peninga sem hann veit að eru falsaðir hljóta sömu refsingu og ef hann hefði sjálfur falsað þá. Brotið getur numið allt að tólf ára fangelsisdómi.