Sjö milljarða vextir sparast við að hraða fjármögnun skuldaniðurfærslunnar

Sjö milljarða vaxtakostnaður sparast við að flýta aðgerðum ríkisstjórnarinnar er varða skuldaniðurfærslu verðtryggðra fasteignaveðlána. Ákvörðun um að hraða fjármögnun aðgerðanna um rúmt ár var kynnt í gær. Þetta kom fram í máli Bjarna Benediktssonar, fjármála- og efnahagsráðherra, í óundirbúnum fyrirspurnum á Alþingi í dag.

Stjórnvöld ætla að tvöfalda fjárframlag sitt til aðgerðanna í ár frá því sem áður hafði verið samþykkt og greiða 40 milljarða króna til skuldaniðurfærslunnar. Það er hægt vegna arðgreiðslu Landsbanka Íslands upp á tæpa 20 milljarða króna og hærri arðgreiðslu frá seðlabankanum en gert var ráð fyrir.

Milljarðarnir sjö nýtast þess í stað í skuldaniðurfærsluna sjálfa og skila því fleiri krónur sér í höfuðstólslækkkun en annars hefði gert. Milljarðarnir sem sparast í vaxtagreiðslur hefðu annars farið til kröfuhafa.

Stjórnarandstaðan hefur gagnrýnt þetta og hefur Guðmundur Steingrímsson, sem var málshefjandi umræðunnar, velt því upp hvort nýta hefði ekki átt þetta svigrúm til verkefna á borð við að bæta heilbrigðis- eða samgöngukerfið. Bjarni sagði að það svigrúm kæmi væntanlega seinna.

 „Kom til greina að nota fjármunina í annað? Auðvitað erum við að skoða öll þessi verkefni sem eru nefnd hér,“ sagði Bjarni í þinginu. „Batnandi hagur ríkissjóðs sem birtist okkur á þessu ári mun að einhverju leiti fylgja okkur inn í næsta ár. Það svigrúm verður notað í þá innviðauppbyggingu sem háttvirtur þingmaður er hér að spyrja um.“