Furðar sig á viðbrögðum stjórnarandstöðunnar

Sigurður Ingi Jóhannsson, ráðherra og varaformaður Framsóknarflokksins, furðar sig á viðbrögðum stjórnarandstöðunnar vegna skuldaleiðréttingarinnar á sama tíma og fyrri ríkisstjórn treysti sér ekki til að fara út í aðgerðina. Sjálfur fékk hann nokkur hundruð þúsund krónur til baka í leiðréttingunni.

„Við framsóknarmenn erum mjög ánægðir. Frá 2009 hef ég barist fyrir því að þessi leiðrétting komi til fólks sem tók venjuleg lán og fékk þennan forsendubrest í höfuðið og við erum býsna ánægðir hvernig til tókst,“ segir hann.

Sigurður Ingi segist skynja almenna ánægju á meðal landsmanna með skuldaleiðréttinguna.  „Ég hef ekki orðið var við annað en mjög góð viðbrögð frá fólki sem sótti um leiðréttingu og þeirra væntinga sem þar voru,“ segir hann.

„Að sjálfsögðu eru einhverjir sem hafa alltaf verið á móti þessu og þeir halda sig náttúrulega við sinn keip en þetta er almenn leiðrétting sem við erum að ná hér í gegn,“ segir Sigurður Ingi en hann er ánægður. „Við lofuðum þessu í kosningabaráttunni og við börðumst fyrir þessu í kosningabaráttunni 2009 og nú er þetta komið í gegn. Við stöndum við okkar og ég er býsna ánægður með það.“

Sigurður Ingi segist vera hissa á viðbrögðum stjórnarandstöðunnar. „Ég er svolítið undrandi á stjórnarandstöðunni því hér er verið að framkvæma það sem þau treystu sér til og sögðu að þau myndu ekki gera meir og töldu að við gætum ekki gert það,“ segir hann.  „Nú er þetta búið og ég er svolítið undrandi á þeirra viðbrögðum.“

Sigurður Ingi sótti sjálfur um skuldaniðurfærslu og fékk nokkur hundruð þúsund krónur. „Ég held að ég sé bara svona nokkuð venjulegur Íslendingur með eðlilegt lán og þær væntingar sem ég var með, þetta er bara með þeim hætti,“ svarar Sigurður Ingi. „Þetta er bara eðlilegt, einhverjir hundrað þúsund kallar, en eðlilegt miðað við þær aðstæður sem við öll lentum í.“