Eingöngu sjálfstæðismenn starfi á skrifstofu Stúdentaráðs

Í nýju opnu bréfi til Stúdentaráðs Háskóla Íslands gagnrýnir stjórn Röskvu, samtaka félagshyggjufólks við háskólann, þá staðreynd að allir fjórir starfsmenn skrifstofu Stúdentaráðs hafi starfað í stjórnum Sambands ungra sjálfstæðismanna (SUS) eða boðið sig fram til slíkra starfa. Í bréfinu er það sagt gera skrifstofuna „hættulega einsleita“ að meðlimir hennar hampi sömu stjórnmálaskoðunum.

Á skrifstofu Stúdentaráðs starfa fjórir launaðir starfsmenn; formaður, varaformaður, hagsmuna- og lánasjóðsfulltrúi og framkvæmdastjóri. Stjórn Röskvu bendir á að skrifstofan á að sinna hagsmunabaráttu tæplega fjórtán þúsund manna samfélags og að hún ætti því vera eins fjölbreyttur hópur og völ er á.

Þá er einnig bent á það að yfirlýst pólitísk stefna SUS einkennist af talsverðri frjálshyggju og meðal annars hefur stjórn sambandsins lagt til að leggja niður stofnanir á borð við Lánasjóð íslenskra lánsmanna og fela viðskiptabönkum hlutverk hans í hendur. Einnig hefur sambandið lagt til að taka stofnanir á borð við Raunvísindastofnun Háskólans, Stofnun Árna Magnússonar í íslenskum fræðum og Landsbókasafn Íslands af fjárlögum ríkisins.

„Ljóst er að fólk hljóti að spyrja sig hvort aðilar sem allir eru í forsvari fyrir pólitíska hreyfingu sem berst fyrir einkavæðingu helstu grunnstoða samfélagsins geti starfað af fullum heilindum fyrir hagsmuni nemenda í ríkisháskóla,“ segir í tilkynningu Röskvu. Ekki náðist í Ísak Rúnarsson, formann Stúdentaráðs, við vinnslu þessarar fréttar.