1.100 ný hjúkrunarrými vantar á næstu 10 árum

1.100 ný hjúkrunarrými vantar á næstu 10 árum svo hægt verði að veita sambærilega öldrunarþjónustu við það sem nú er gert. Þetta kemur fram í svari heilbrigðisráðherra við fyrirspurn Bjarkeyjar Gunnarsdóttur um öldrunarstofnanir.

Kostnaður við byggingu hjúkrunarrýmanna er áætlaður 28,6 milljarðar króna á verðlagi ársins 2014..

Þá er áætlaður kostnaður við endurnýjun á húsnæði öldrunarstofnana um 65 milljarðar króna á næstu 15 árum.

Í svari heilbrigðisráðherra kemur jafnframt fram að ekki sé gert ráð fyrir tvíbýlum í núverandi viðmiðum við byggingu og starfsemi öldrunarstofnana. Miðað er við að allir búi í einbýli en enn vantar 360 ný hjúkrunarrými upp á svo að það markmið náist.