„Námsmatsstofnun myndi allavega ekki fá A frá mér"

„Mér finnst þetta skjal nokkuð pínlegt,“ segir Hulda D. Proppé, kennari í Sæmundarskóla, sem birti í dag færslu á Fésbókarsíðu sinni þar sem hún bendir á málfarsvillur í skjali sem birt var á síðu Námsmatsstofnunnar.

„Nú hafa börn í 10. bekk nýverið fengið einkunnir úr samræmdum prófum og þar á meðal mínir nemendur. Samræmd próf eru mjög umdeild og vil ég ekki tjá mig um þau sem slík. Hins vegar get ég ekki annað en velt því fyrir mér hvort Námsmatsstofnun vandi sig jafn mikið við að útbúa prófin og fara yfir þau þegar hún birtir svona upplýsingar á heimasíðu sinni.“

Hulda á við blað sem birtist á síðu stofnunarinnar þar sem farið er yfir hæfnismið í íslensku fyrir nemendur í 10. bekk.

„Vissulega geri ég mér grein fyrir því að starfsfólk Námsmatsstofnunar er mannlegt, líkt og ég, og ekki yfir mistök hafið. Það orkar hins vegar tvímælis að skjal, sem á að vera leiðarvísir til að meta hæfni nemenda til að nota málið okkar, sé jafn illa unnið og raun bar vitni. Fyrst og fremst finnst mér þetta vera vandræðalegt fyrir stofnunina sjálfa því starf hennar ætti að einkennast af fagmennsku fram í fingurgóma.“

Hulda telur það viðunandi að samræmd próf séu lögð fyrir nemendur til að skoða stöðu þeirra í námi og gera ráðstafanir til að mæta þeim á þeirri vegferð sem nám er.

„Hins vegar finnst mér nemendur taka einkunninni sem stimpli á eigin getu fremur en leiðarvísi um hvað betur má fara og það er umhugsunarvert.“

Hulda segir að hún hafi útskrifast sem kennari síðastliðið vor og búi því ekki yfir mikilli eða langri kennslureynslu þó það sé hennar skoðun að menntunin hafi gert hana að fagmanni.

„Mér finnst þessi próf alls ekki vera í samræmi við þau hæfniviðmið og grunnþætti menntunar sem birtast í Aðalnámskrá grunnskóla og eiga að liggja til grundvallar í allri kennslu. Sú nýja einkunnagjöf sem nú er farið eftir er þó það sem kemur mér hvað mest á óvart. Allt samfélagið er mótað af einkunnakvarða, byggðum á tölum, og þar af leiðandi er erfitt að skipta yfir í ný viðmið. Einkunnirnar fyrir samræmdu prófin í ár eru þær fyrstu sem við sjáum á þessum nýja kvarða. Einmitt þess vegna hefði Námsmatsstofnun, að mínu mati, átt að vanda betur til verka áður en kvarðinn var kynntur almenningi.“

En hvað hefði Námsmatsstofnun fengið í einkunn frá Huldu?

„Ég ætla ekki að dæma textann sem slíkan en ég hefði að minnsta kosti ekki gefið A fyrir vandvirkni. Ég vona mjög heitt að sá sem sá um að vinna þetta skjal og kom því í umferð sé ekki sá sami og sló inn einkunnir nemenda á samræmdum prófum í ár.“

Nú hefur Námsmatsstofnun fjarlægt umrætt skjal út á vefsíðu sinni og einnig kemur þar fram leiðrétting:

,,Fyrir mistök birtist á heimasíðu stofnunarinnar röng útgáfa af skjali með skýringum á þessum kvarða. Skjalið hefur nú verið fjarlægt af heimasíðunni og verður leiðrétt útgáfa birt fljótlega.“

Hér að neðan má sjá skjalið umrædda.

Námsmatsstofnun sendi í kvöld frá sér fréttatilkynningu þess efnis að henni hafi að undanförnu borist ábendingar um atriði á samræmdum könnunarprófum í 10. bekk sem orkað geta tvímælis.

„Snúa ábendingarnar bæði að þyngd prófverkefna almennt og að einstaka prófspurningum. Námsmatsstofnun kappkostar að vanda til gerðar prófa og hefur leitað eftir athugasemdum frá kennurum um þau. Hafa athugasemdir kennara við próf þessa árs ekki verið meiri en undanfarin ár. Stofnunin fagnar þeirri umræðu um samræmd próf sem átt hefur sér stað og mun taka allar ábendingar til skoðunar. Við birtingu niðurstaða samræmdra prófa þessa árs er stuðst við nýjan einkunnakvarða og gefnar hæfnieinkunnir með bókstöfunum A, B, C, D. Fyrir mistök birtist á heimasíðu stofnunarinnar röng útgáfa af skjali með skýringum á þessum kvarða. Skjalið hefur nú verið fjarlægt af heimasíðunni og verður leiðrétt útgáfa birt fljótlega. 

Námsmatsstofnun mun halda kynningarfund um þróun samræmdra prófa þann 24. nóvember kl. 14 í húsnæði stofnunarinnar að Borgartúni 7A. Eru allir áhugamenn um betri samræmd próf hvattir til að mæta og taka þátt í umræðu um framþróun þeirra.“