Tóku fyrstu skóflustungu að stækkun flugstjórnarmiðstöðvarinnar

Hanna Birna Kristjánsdóttir innanríkisráðherra og Dagur B. Eggertsson borgarstjóri tóku fyrstu skóflustungu að stækkum flugstjórnarmiðstöðvarinnar í Reykjavík í dag.

„Við skóflustunguathöfnina óskaði innanríkisráðherra Isavia til hamingju með þennan mikilvæga áfanga og borgarstjóri kvað hann ekki síður mikilvægan en nýleg skóflustunga að lyfjafyrirtæki í Vatnsmýrinni sem tryggði að önnur verðmæt þekkingartengd starfsemi héldist í landinu. Ráðgert er að nýbyggingin verði tekin í notkun síðari hluta ársins 2016,“ segir í tilkynningu frá Isavia.

Starfsemi alþjóðaflugþjónustu Isavia hófst í gamla flugturninum á Reykjavíkurflugvelli og er nú á fjórum stöðum í borginni. Mest umsvif eru í flugstjórnarmiðstöðinni sem tekin var í notkun árið 1994. „Þaðan er stjórnað um þriðjungi allrar flugumferðar yfir Norður-Atlantshaf á 5,4 milljón ferkílómetra svæði sem nær allt norðurá Norðurpól. Umsvifin fara sívaxandi ár frá ári og stækkun húsnæðisins löngu orðið tímabær.

Síðasta ár flugu rúmlega 116 þúsund flugvélar samtals nærri 170 milljón kílómetra um íslenska flugstjórnarsvæðið. Þegar hafa á þessu ári 112 þúsund flugvélar farið um svæðið og stefnir í allt að 15% heildaraukning verði á árinu.

Stærstur hluti umferðarinnar er yfirflug sem Isavia sinnir samkvæmt samningi við Alþjóðaflugmálastofnunina. Hluti samningsins nær til flugleiðsöguþjónustu yfir Grænlandi og Færeyjum í góðu samstarfi við stjórnvöld í þessum nágrannaríkjum okkar. Brýnt er þó að vera á varðbergi gagnvart framtíð þjónustunnar sem viðurkennd er af notendum fyrir gæði og hagkvæmni.

Starfsemin er afar mikilvæg þjóðhagslega en þótt hún sé rekin á kostnaðargrunni skapar hún á þriðja hundrað vel launuð sérfræðistörf auk afleiddrar starfsemi og færir þjóðarbúinu nærri fjóra milljarða króna í hreinar gjaldeyristekjur árlega.

Stækkun flugstjórnarmiðstöðvarinnar léttir ekki aðeins á starfseminni þar heldur gerir kleyft að  flytja flugfjarskiptadeild frá Sóleyjarrima ásamt starfsemi sem fer fram annarsstaðar í borginni í sama húsnæði. Kostnaður við framkvæmdina verður um einn milljarður króna sem dreifist á næstu tvö ár og greiðist af notendum. Aukið og bætt húsrými eflir flugstjórnarmiðstöðina og þjónustu við sívaxandi flugumferð yfir Norður-Atlantshaf,“ segir í tilkynningunni.