Þykir ómaklega vegið að Framsóknarflokknum

Höskuldur Þórhallsson, þingmaður Framsóknarflokks og  nýkjörinn forseti Norðurlandaráðs, segir að hann hlakki til að starfa áfram á vettvangi á ráðsins og nú sem forseti þess.

„Þetta gerir okkur Íslendingum kleift að beita okkur enn frekar á vettvangi ráðsins. Það eru mörg spennandi verkefni framundan og við munum meðal annars leggja áherslu á Norðurheimskautið og hafið okkar, samstarf á sviði utanríkismála og lýðheilsu barna,“ segir Höskuldur í samtali við Vísi.

Hvernig kom mótframboð Steingríms við þig?

„Við höfum haldið lýðræðinu hátt á lofti innan Norðurlandsráðs og ef menn vilja bjóða fram annan kandídat þá gera menn það. Það fór fram lýðræðisleg kosning og þetta var niðurstaðan. Ég er mjög glaður með það mikla traust sem mér var sýnt.“

Róbert Marshall, þingmaður Bjartrar framtíðar, var einn af þeim níu sem kusu Steingrím. Hann sagði í samtali við fréttastofu fyrr í dag að hann hefði ekki stutt Höskuld í kjörinu vegna þess að Framsóknarflokkurinn hefur „ekki útskýrt hvert hann er að fara í grundvallarefnum eins og trúfrelsi og rétti manna til að byggja sér þau bænahús sem þeir vilja.“

Aðspurður um þessi ummæli Róberts segir Höskuldur:

„Mér finnst ómaklega að Framsóknarflokknum vegið og vil nú benda á að við samþykktum á miðstjórnarfundi mjög skýra stefnu þar sem við gagnrýnum harðlega alla mismunun, sama á hvaða stigi hún er. Mér finnst leitt að þessi sjónarmið skuli hafa haft áhrif því að við þurfum að geta unnið saman innan Íslandsnefndarinnar að góðum málefnum. Ég var að vonast til þess að Róbert og félagar hans í Bjartri framtíð myndu taka ábyrga afstöðu í þeim málefnum, eins og hinir flokkarnir hafa gert. En svona popúlístísk viðhorf eiga kannski upp á pallborðið hjá einhverjum.“

Höskuldur segir að flokkurinn geti ekki talað skýrar í þessum efnum og vísar í tillöguna sem samþykkt var einróma á miðstjórnarfundi flokksins fyrr á árinu og bætir við:

„Mér þykir leitt að þessi umræða skuli koma upp þegar við Íslendingar eigum frekar að fagna því að eiga forseta Norðurlandaráðs næsta árið og ég hefði óskað að við gætum öll unnið saman að góðum verkefnum á sviði Norðurlandanna í stað þess að taka þessa umræðu enn einu sinni upp og ég harma að það hafi verið gert.“

Heldurðu að þetta muni hafa áhrif á samstarfið í Íslandsnefndinni?

„Ja, þetta eru skilaboð sem við framsóknarmenn þurfum að íhuga.“