Orðið „fáviti“ fellt úr hegningarlögum

Samkvæmt frumvarpi til laga um breytta hugtakanotkun verður orðið „fáviti“ fellt úr hegningarlögum. Orðið er að finna í 222. grein almennra hegningarlaga en samkvæmt frumvarpinu kemur „einstaklingi með þroskahömlun“ í staðinn.  

Í 222. grein almennra hegningarlaga segir: „Hver, sem vísvitandi eða af gáleysi fær barni, yngra en 15 ára, geðveikum manni, fávita eða ölvuðum manni hættulega muni eða efni í hendur, skal sæta sektum eða [fangelsi]1) allt að 3 mánuðum.“

Á vef innanríkisráðuneytisins segir að frumvarpið sé lagt fram sem hluti af undirbúningi fullgildingar samnings Sameinuðu þjóðanna um réttindi fatlaðs fólks.

Samkvæmt frumvarpinu er orðið „fatlaðir“, í hinum ýmsu beygingarmyndum, skipt út fyrir „fatlað fólk“. Þá er lagt til að orðin „einstaklingar með samþætta sjón- og heyrnarskerðingu“ komi í stað orðanna „daufblindir einstaklingar“ og „daufblindir“.