Hvetja yfirvöld til að ákveða framtíðarstöðu Hólaskóla

Útlit er fyrir að uppsafnaður halli Háskólans á Hólum muni nema 178 milljónum króna í árslok 2014. Ríkisendurskoðun hefur því lýst yfir þungum áhyggjum vegna skulda skólans og hvetur yfirvöld menntamála og forráðamenn skólans til að taka á þessum vanda sem fyrst. Jafnframt þurfi yfirvöld að ákveða framtíðarstöðu skólans. Þetta kemur fram á vef Ríkisendurskoðunar.

Vakin var athygli á erfiðri fjárhagsstöðu Háskólans á Hólum árið 2011. Skólinn glímdi við mikinn uppsafnaðan halla og háar skuldir, einkum við ríkissjóð. Að mati ríkisendurskoðunar vakti þetta spurningar um hagkvæmni Hólaskóla sem rekstrareiningar.  Skólinn þarf að hafa tiltekinn lágmarksfjölda ársnemenda til að geta staðið fjárhagslega undir þeim faglegu kröfum sem gerðar eru til háskóla. Fjöldi nemenda við Hólaskóla náði þó aldrei þessu lágmarki.

Ríkisendurskoðun skilaði inn tíu ábendingum til skólans og mennta- og menningarmálaráðuneytisins í skýrslu sinni árið 2011. Telur Ríkisendurskoðun þó að skólinn hafi ekki brugðist sem skyldi við níu af þessum ábendingum.

Ráðuneytið var þá meðal annars hvatt til að ákveða framtíðarstöðu Hólaskóla, tryggja að rekstur hans rúmaðist innan fjárheimilda og finna varanlega lausn á skuldum skólans við ríkissjóð. Stjórnendum skólans var m.a. bent á að þeir yrðu að temja sér aga og fagleg vinnubrögð við fjármálastjórn til að tryggja að rekstur skólans væri innan fjárheimilda.



Í nýrri eftirfylgniskýrslu Ríkisendurskoðunar kemur fram að fjárhagsstaða Hólaskóla hefur versnað frá árinu 2010. Í árslok 2013 nam uppsafnaður halli skólans 157 milljónum króna sem samsvaraði um 52% af fjárveitingu ársins. Heildarskuldir skólans námu 245 milljónum króna, þar af nam skuld við ríkissjóð 233 milljónum króna. Útlit er fyrir að uppsafnaður halli muni nema 178 milljónum króna í árslok 2014. Að mati Ríkisendurskoðunar er fjárhagsstaða Hólaskóla mikið áhyggjuefni og brýnt að ráðuneytið og forráðamenn skólans taki á vandanum sem fyrst.