Sigmundur Davíð sækir innblástur til dóttur sinnar

Sigmundur Davíð Gunnlaugsson forsætisráðherra bauð Jóni Ársæli Þórðarsyni í heimsókn á skrifstofu sína við upptökur á Sjálfstæðu fólki.

Nóg var að finna af skýrslum á skrifstofu forsætisráðherrans sem viðurkenndi að hafa ekki lesið þær allar spjaldanna á milli. Skrifborðið hans virkaði nokkuð vel skipulagt.

„Ég er tiltölulega nýbúinn að taka til á þessu borði og færa vandann yfir á næsta borð. Ekki líta á það sem táknrænt hvernig gera á hlutina í stjórnmálum,“ grínaðist Sigmundur Davíð.

Þáttastjórnandinn rak augun í mynd af dóttur ráðherrans upp í hillu.

„Ég kíki á hana þegar ég þarf að hressa mig við og koma mér í gott skap,“ sagði ráðherrann sem meðal annars bauð Jóni Ársæli upp á harðfisk.

Þátturinn í heild sinni verður sýndur á Stöð 2 næstkomandi sunnudag.