Afhenti fjóra styrki til rannsóknarverkefna á sviði jafnréttismála

Sigmundur Davíð Gunnlaugsson forsætisráðherra afhenti í dag fjóra styrki til rannsóknarverkefna á sviði jafnréttismála samtals að upphæð 8,6 milljónir króna í tilefni af kvennafrídeginum og dags Sameinuðu þjóðanna.

Styrkina hlutu Björg Hjartardóttir, doktorsnemi við University of British Columbia í Kanada til rannsóknar á Vestur-íslenska kvenréttindablaðinu Freyja, Guðný Björk Eydal prófessor og Ingólfur V. Gíslason dósent við Háskóla Íslands til rannsóknarinnar Jafn réttur til fæðingarorlofs: Hvernig haga pólskir og íslenskir foreldrar atvinnuþátttöku og umönnun barna sinna?, Guðný Gústafsdóttir doktorsnemi við Háskóla Íslands til rannsóknar á mótsögnum kvenleikans, kyngervi og þegnrétti á Íslandi og loks Marta Einarsdóttir sérfræðingur við Rannsóknarmiðstöð Háskólans á Akureyri til rannsóknar á íslensku ofurfjölskyldunni – samræmingu fjölskyldu og atvinnulífs. Í mörgum tilvikum vinna nemar og aðrir samstarfsmenn að rannsóknum með styrkþegum.

Í ávarpi hans kom fram að við stofnun Jafnréttissjóðs á þrjátíu ára afmæli kvennafrídagsins 2005  hafi sjóðurinn verið kynntur sem gjöf til jafnréttis- og kvennahreyfingarinnar í landinu og þakklætisvottur fyrir það afl, frumkvæði  og nýsköpun sem í henni hefur falist til framfara, mannréttinda og almennrar velsældar í samfélagi okkar.

„Forsætisráðherra vék meðal annars að fyrirhugaðri karlaráðstefnu sem Ísland og Súrinam hyggjast standa fyrir í New York á næsta ári og kvað hann tíðindin sem felast í þeirri ráðstefnu fyrst og fremst vera þau að þar verða karlar kallaðir til umræðu um kynbundið ofbeldi,“ segir í tilkynningu frá forsætisráðuneytinu.