Sakaður um að útvega vinnu í Bolungarvík fyrir 150 þúsund krónur

Lögreglan á Vestfjörðum hefur í tæpt ár rannsakað ásakanir um fjárkúgun á hendur verkstjóra hjá útgerðarfyrirtækinu Jakobi Valgeiri ehf í Bolungarvík. Er maðurinn, sem er Pólverji, sakaður um að hafa innheimt 1000 evrur eða jafnvirði um 150 þúsund íslenskra króna hjá samlöndum sínum gegn loforði um vinnu.

Rannsókn lögreglu hófst í kjölfar þess að lögreglunni og Bæjarins besta barst bréf þar sem tíu Pólverjar sökuðu samlanda sinn um fyrrnefndan verknað. Hefur rannsókn staðið yfir síðan, nokkrir verið yfirheyrðir en rannsóknin beinist að því hvort um saknæman verknað sé að ræða.

Almar Þór Möller, lögmaður Jakobs Valgeirs ehf og verkstjórans sem sakaður er um verknaðinn, segir í samtali við RÚV að rannsóknin hafi tekið alltof langan tíma. Verkstjórinn hafi ekki stöðu grunaðs manns í málinu og hafi enn ekki verið yfirheyrður.

Þá bendir Almar einnig á að átján starfsmenn fyrirtækisins, þar á meðal þeir tíu sem nafngreindir voru í bréfinu, hafi fyrir tæpu ári undirritað yfirlýsingu þess efnis að þeir hafi ekki greitt verkstjóranum fyrir að útvega sér vinnu hjá fyrirtækinu. Lögreglan hafi fengið þær yfirlýsingar sendar á sínum tíma.