Nýr hjólastígur frá Starhaga í Skerjafjörð

Nú er unnið að lokafrágangi við endurnýjaða gönguleið og hjólastíg frá Starhaga í Vesturbæ að Einarsnesi í Skerjafirði. Nýi hjólastígurinn tengir hjólastíginn á Ægissíðu við hjólastíg í Skerjafirði.

Þetta kemur fram í tilkynningu frá Reykjavíkurborg. Stígurinn er upplýstur. Hinum megin við Suðurgötu hefur einnig verið lagður hjólastígur frá Þorragötu að Bauganesi. Á þeim kafla stendur einnig til að leggja göngustíg en hann verður ekki kláraður í þessum áfanga. Við Einarsnes standa síðan yfir framkvæmdir við endurnýjun lagna og göngustígs að Bauganesi.

Gönguleiðin frá Starhaga að Einarsnesi hefur einnig verið endurnýjuð með steyptri gangstétt. Nú er unnið að því að þökuleggja og ganga frá tengingum við hjóla- og göngustíga á Ægissíðu.

Verkinu lýkur í byrjun nóvember en framkvæmdir við Einarsnes halda áfram og ætti að ljúka í nóvember ef veður leyfir.