Norðurlöndin samræma markaðs- og kynningarstarf

Norðurlöndin ætla sameiginlega að kynna og marka Norðurlöndunum stöðu á alþjóðavettvangi, samkvæmt nýrri áætlun sem samstarfsráðherrar landanna samþykktu á Norðurlandaráðsþingi í morgun.

Norðurlandaráðsþing hófst í Stokkhólmi í Svíþjóð í morgun og lýkur á fimmtudag. Samstarfsráðherrar ríkjanna kynntu nýja áætlun í morgun sem á að styrkja Norðurlöndin á alþjóðavettvangi.

Í tilkynningu frá samstarfsráðherrunum segir að mikil forvitni og áhugi sé á Norðurlöndunum víðs vegar um heim og nái sá áhugi til margra sviða. Ráðherrarnir segjast þess fullvissir að Norðurlöndin geti á mörgum sviðum náð meiri árangri saman heldur en hvert um sig. Það nái einnig til þess að kynna og marka löndunum stöðu á heimsvísu. Þess vegna ætli ýmsir norrænir aðilar á næstu árum að koma skipulagi á vinnuna með því að efla samkeppnishæfni og áhrif landanna á alþjóðavettvangi.

Eygló Harðardóttir félagsmálaráðherra er samstarfsráðherra Íslands. Hún segir áhuga umheimsins á Norðurlöndunum ekki aðeins eiga við um bókmenntir, kvikmyndir og hönnun, heldur líka samfélagsgerð landanna og þau gildi sem hún byggi á. Skilningurinn sé sá að Norðurlöndin virðist hafa svörin við ýmsum af þeim spurningum sem verið sé að spyrja um allan heim einmitt núna. Til dæmis hvernig hægt sé að búa til opið samfélag sem geti þróast og haldið velli á erfiðum tímum.

Eygló segir að ríkin eigi að nota þessa forvitni – bæði til að veita öðrum innblástur en jafnframt til að styrkja samfélög Norðurlandanna.

Norræna ráðherranefndin á að samhæfa og samræma norrænt starf að kynningarmálum í samstarfi við opinbera aðila og einkaaðila. Grunnmarkmiðið er að efla samkeppnishæfni og alþjóðleg áhrif Norðurlanda og norrænu ríkjanna.

Í áætluninni eru valin fimm svið sem á að kynna: norræna líkanið, Norðurlönd sem þekkingarsamfélög, norrænt hugarflug og nýsköpun ásamt náttúru og menningu Norðurlanda.