Hverfisgata opnar á ný í vikulok

Framkvæmdir við Hverfisgötu í Reykjavík eru nú á lokastigi en unnið hefur verið að endurgerð götukaflans frá Vitastíg að Snorrabraut í sumar. Síðasti áfanginn, frá Barónsstíg að Snorrabraut, verður opnaður í lok vikunnar og lýkur þar með framkvæmdum við götuna í bili.

Í fréttatilkynningu frá Reykjavíkurborg segir að gatan hafi verið endurnýjuð frá Klapparstíg að Snorrabraut. „Í fyrra var unnið að framkvæmdum við götukaflann frá Vitastíg að Klapparstíg en á þessu ári hafa framkvæmdir staðið yfir frá Vitastíg að Snorrabraut. Skipt hefur verið um allar lagnir í götunni, lýsing endurnýjuð og allt yfirborð götu og gangstétta. Þá er búið að setja hita í gönguleiðir, hjólareinar og upphækkuð, steinlögð gatnamót.“

Upphitaðar hjólareinar eru nú beggja vegna götunnar og hefur aðstaða til að leggja og læsa hjólum verið bætt með varanlegum götugögnum. Þar að auki hefur trjágróðri verið plantað á mörgum stöðum í götunni til að fegra umhverfið. „Eftir er að taka neðri hluta götunnar frá Klapparstíg að Lækjargötu í gegn en ekki hefur verið ákveðið endanlega hvenær ráðist verður í þær framkvæmdir,“ segir í tilkynningunni.