Erfitt að réttlæta tugprósenta launahækkun lækna

Framkvæmdastjóri Samtaka atvinnulífsins telur óráðlegt að semja við lækna um tugprósenta launahækkun. Slíkt myndi valda verulegum titringi á vinnumarkaðnum sem aftur gæti orsakað verðbólgu og minni framleiðni.

Samkvæmt heimildum fréttastofu lætur nærri að kröfur lækna séu um 36 prósenta launahækkun en tilboð stjórnvalda er hinsvegar fjarri því eða þriggja prósenta hækkun á launum.

„Það er alveg ljóst að þarna eru mjög háar kröfur á ferðinni ef þessar tölur eru réttar og langtum hærri en hefur verið samið um á almennum vinnumarkaði. Ég held að það sé óhætt að reikna með því að slíkt gæti valdið verulegum titringi inn á vinnumarkaðinn ef samið yrði um slíkt við lækna,“ segir Þorsteinn Víglundsson, framkvæmdastjóri Samtaka atvinnulífsins.

Kjarasamningar ASÍ sem gerðir voru í desember í fyrra og í febrúar á þessu ári hljóðuðu upp á 2,8 prósent. Þeim viðmiðum hefur þó ekki verið fylgt að öllu leyti en kennarar sömdu um mun meiri hækkun, upp undir þrjátíu prósent.

„Til þess að tilefni sé til fyrir svo mikilla breytinga hjá launum lækna þarf að sýna fram á að þeir hafi með einhverjum hætti dregist svo mikið aftur úr öðrum stéttum hér á landi.“

Þorsteinn óttast að ef gengið verður að kröfum lækna muni það leiða af sér ólgu á vinnumarkaðnum þar sem aðrar stéttir muni krefjast sömu launahækkana. Einungis ætti að ganga að kröfum lækna ef hægt væri að sýna fram á að þeir hafi dregist aftur úr með laun sín.

„En prósentubreytingar af því tagi sem þarna er verið að ræða um sé langt út fyrir þann ramma sem hægt væri að réttlæta með einhverju slíku,“ segir Þorsteinn.

 

Næsti samningafundurinn í deilunni verður á morgun en annar dagur verkfallsins var í dag.

Töluverði biðröð var á læknavaktinni í Kópavogi klukkan fimm síðdegis þegar opnað var þar. Kunnugir segja þó að fjöldinn hafi ekki verið meiri en á venjulegum degi.



Ólafur Baldursson, framkvæmdastjóri lækninga hjá Landspítalanum sagði í samtali við fréttastofu í dag að verkfallsaðgerðirnar hefðu valdið töluverðri röskun á þjónustunni í dag. Fresta þurfti 21 skurðaðgerð en ríflega þrjátíu aðgerðum var frestað í gær. Þá hafi allt gengið stóráfallalaust fyrir sig á bráðamóttöku Landspítalans. Á miðnætti leggja niður störf læknar á sjúkrahúsinu á Akureyri og á lyflækningasviði Landspítalans.