Vilja skoða mögulegt sambandsríki Norðurlandanna

Steingrímur J. Sigfússon þingmaður Vinstri grænna og Róbert Marshall þingflokksformaður Bjatrar framtíðar eru meðflutningsmenn á tillögu sem lögð var fyrir Norðurlandaráð í dag sem miðar að því að Norðurlöndin verði sambandsríki í náinni framtíð.

Þeir Steingrímur og Róbert leggja tillöguna fram ásamt níu þingmönnum mið- og vinstriflokka á þingi Norðurlandaráðs. Tillagan byggir á hugmyndum sænska sagnfræðingsins Gunnars Wetterberg sem hefur mikla reynslu innan sænska stjórnkerfisins. En í árbók Norðurlandaráðs árið 2010 setti hann hugmyndir sínar fram um að Norðurlöndin gætu orðið sambandsríki á næstu 25 til 30 árum í anda Sviss og jafnvel með sameiginlegan gjaldmiðil.

„Og það voru mjög margar fínar hugmyndir sem þar voru settar fram sem við sem flytjum þessa tillögu viljum vinna áfram með,“ segir Róbert.

Sérfræðingahópur yrði skipaður til að útfæra þessarar hugmyndir og hvernig nánara og dýpra samstarf Norðurlandanna gæti litið út.

„Þetta er náttúrlega töluverð framtíðarmússík en engu að síður eitthvað sem gæti verið mjög skemmtilegt að skoða frekar,“ segir Róbert.

En þótt margt sé líkt með Norðurlöndunum eru líka stórir þættir sem skilja þau að eins og Evrópusambandsaðild Danmerkur, Svíþjóðar og Finnlands en Noregur og Ísland standa utan þess bandalags.

„Þessi ríki hafa auðvitað verið að vinna mjög mikið saman. Við Íslendingar og Norðmenn höfum t.d. reitt okkur mjög mikið á hinar Norðurlandaþjóðirnar sem eru innan Evrópusambandsins þegar kemur að löggjöf. Löggjöf sem er væntanleg og er í smíðum og hefur áhrif á okkur,“ segir Róbert.

Hann sér þó Norðurlöndin ekki fyrir sér með einni sambandsstjórn í framtíðinni.

„Nei ég geri það í raun og veru ekki. Ég myndi vilja sjá fyrir mér þróun Norðurlandaráðs sem hefði öflugri tengingu við þjóðþingin,“ segir Róbert Marshall.