Neyðarlán til Kaupþings var rétt ákvörðun

Geir H. Haarde , fyrrverandi forsætisráðherra, var gestur Björns Inga Hrafnssonar í þættinum Eyjan á Stöð 2 í dag. Geir ræddi meðal annars um 500 milljón evra neyðarlán sem Seðlabankinn veitti Kaupþingi þann 6. október árið 2008, sama dag og Geir bað guð um að blessa Ísland, í frægu sjónvarpsávarpi. Fyrir liggur að tap bankans, og þannig skattgreiðenda, vegna þess láns er um 35 milljarðar króna.

Geir segist hafa verið samþykkur því að lánið yrði veitt. Þetta hafi verið rétt ákvörðun á þessum tímapunkti.



„Sú ákvörðun var að sjálfsögðu tekin í ljósi þeirra aðstæðna sem þá voru uppi. Það verður að meta hana í ljósi þeirra aðstæðna, ekki þess sem að menn vita núna. Það var auðvitað tilraun til að bjarga Kaupþingi og ef það hefði tekist, að Kaupþing hefði lifað þetta af, stærsti bankinn, þá hefði þessi mynd orðið allt önnur og miklu viðráðanlegri,“ segir Geir.

Sama dag og lánið var veitt átti sér stað símtal milli Geirs og Davíðs Oddssonar, þáverandi seðlabankastjóra, þar sem þeir ræða lánveitinguna. Upptaka af símtalinu er geymd hér í Seðlabanka Íslands, en ítrekaðar tilraunir til að fá afrit af símtalinu, meðal annars af fjárlaganefnd Alþingis, hafa engan árangur borið.

„Þetta samtal, það er búið að vera að magna það upp. Ómerkilegir stjórnmálamenn sem hafa verið að reyna að gera það að einhverju aðalatriði. Þetta samtal var tekið upp, reyndar ekki með minni vitund. Ég vil ekki birta það því ég tel að það eigi ekki að hlera eða taka upp samtöl við forsætisráðherrann við svona aðstæður. Þá geta menn bara komið seinna og reynt að koma á menn höggi vegna þess,“ segir Geir.