Helgi Áss ekki starfsmaður LÍÚ við álitsgerðina

Dómur féll í Héraðsdómi Vestfjarða í dag og var Jón Guðbjartsson dæmdur til að greiða Helga Áss Grétarssyni miskabætur og voru ummæli hans dæmd dauð og ómerk. Dóminn felldi Sigríður Elsa Kjartansdóttir dómstjóri.

„Stórmeistarinn sækir einhverja aura til mín fyrir það að ég taldi hann vanhæfan til að vera notaður sem álitsgjafi í þessu. Ég hef oft áður þurft að bíta í tunguna en það sér ekki á henni, ég er enn kokhraustur,“ segir Jón Guðbjartsson, fyrrverandi útgerðarmaður fyrir vestan.

Helgi Áss Grétarsson, dósent við lagadeild Háskóla Íslands, stefndi Jóni fyrir meiðyrði, krafðist þess að ummæli sem Jón lét fjalla á bb.is og á Bylgjunni yrðu dæmd dauð og ómerk og fór fram á tvær milljónir í miskabætur vegna þess að ummælin væru til þess fallin að valda honum álitshnekki.

Ríkið ekki bótaskylt

Ummælin snéru að stöðu Helga Áss innan Háskólans og tengsl hans við Landssamband íslenskra útvegsmanna. Atvinnuveganefnd Alþingis fékk Helga Áss til að skrifa álitsgerð þar sem komist var að þeirri niðurstöðu að sú ákvörðun að gefa veiðar á úthafsrækju frjálsar hafi verið ólögmæt og að hana hefði ekki verið hægt að taka nema breyta lögum.

Samkvæmt álitsgerðinni gerði frumvarp sjávarútvegsráðherra ríkið ekki bótaskylt gagnvart þeim sem áttu aflahlutdeildir eða þeim sem höfðu aflað sér veiðireynslu síðustu ár. Frumvarpið gekk út á að veiðum á úthafsrækju yrði aftur stjórnað samkvæmt meginreglu aflamarkskerfisins.

Jón hélt því fram að Helgi Áss væri á launum hjá LÍÚ. Helgi Áss gegndi um tíma stöðu við Lagastofnun HÍ sem var fjármögnuð af LÍÚ en samstarfssamningi LÍÚ og Lagastofnunar lauk sumarið 2012. Þann tíma sem Helgi Áss gegndi stöðunni var hann starfsmaður Háskóla Íslands.

Ærumeiðandi staðhæfingar ganga ekki

Dómur féll sem sagt í dag, fyrir Héraðsdómi Vestfjarða, og hafði Helgi Áss sigur í þessu tafli. Jón segist vera dæmdur til að borga einhverjar litlar skaðabætur, birtingu og málskostnað. „Það er nú ekki langt síðan ég fékk þetta í hausinn en ég held að allur kostnaður af stórmeistaranum sé um milljón. Ég veit ekkert í minn haus, en borga þetta bara eftir að vextir hafa verið reiknaðir. Geri ráð fyrir því að þessu máli sé lokið. Þetta er ekki alveg mín deild,“ segir Jón. Hann efast um að hann muni áfrýja málinu.

Arnar Kormákur Friðriksson er lögmaður Helga Áss og hann segir fullan sigur hafa unnist í málinu. „Það myndi ég segja. Miskabætur í lægri kantinum en aðalatriðið er að dómurinn fellst á allar kröfur Helga. Staðfestir það sem lagt var upp með að þarna var með ærumeiðandi hætti vegið að heiðri hans sem fræðimanns á sviði lögfræði. Sýnir að umræðan um þessi mál þarf að fara fram á réttum forsendum og ummæli þurfa að vera sett fram með viðeigandi hætti, ekki ærumeiðandi staðhæfingum sem ekki standast.“

Nær er skinnið er skyrtan

Jón, sem er 68 ára gamall, segist hvergi nærri af baki dottinn. Og honum finnst, í það minnsta í samanburði við annálaða strigakjafta fyrir vestan, hann sjálfur vera prúður til orðs og æðis. En, hann taldi stórmeistarann vera tengdan hagsmunum. „Sjálfur hefði ég dæmt mig vanhæfan. Hann var á launum í sex ár hjá LÍÚ. Nær er skinnið en skyrtan: Þú átt að taka tillit til þess að börnin þín eru þér nákomnari en fólk út í bæ. Þannig er það nú bara. Ef menn skilja þetta ekki, tjahh þá... jæja, ég fékk á baukinn og verð að bíta í það súra epli.“

Í dómsorði eru eftirfarandi ummæli, sem höfð voru eftir Jóni á fréttavefnum www.bb.is 13. febrúar 2014, dæmd dauð og ómerk:

„Helgi Áss er á launum hjá LÍÚ sem borgar stöðu hans við háskólann.“

„...og þá er kallaður fram á sjónarsviðið sérlegur lögfræðingur veldisins til að skera úr um málin.“

„Láta mann á launum hjá LÍÚ skrifa álit“

Og, eftirfarandi ummæli sem Jón lét falla í Bítinu á Bylgjunni 18. febrúar 2014, eru einnig dæmd dauð og ómerk:

„...það svolítið skrýtið að Helgi Áss Grétarsson starfsmaður LÍÚ upp í háskóla hann skuli hafa verið beðinn um að búa til álit fyrir atvinnuveganefnd.“

Í dómsorði er Jóni gert að greiða Helga Áss 300.000 krónur í miskabætur auk vaxta frá 13. febrúar 2014 til 2. maí 2014, birtingarkostnað sem nemur 63.252 krónum og 660.600 krónur í málskostnað.