Fylgst með gosmengun á leikskólum

Foreldrar leikskólabarna hafa margir áhyggjur af áhrifum gosmengunar á börnin sín. Leikskólastjórar fylgjast flestir náið með loftgæðum og hafa börnin inni ef vafi er á að þau séu í lagi.

Á Bakkaborg í Grafarvogi léku börnin sér úti í dag þegar fréttastofu bar að garði enda voru loftgæði þá í góðu lagi á svæðinu. Leikskólastjórar eiga fullt í fangi með að fylgjast með hvort að gosmengun sé í borginni. Loftgæðin breytast oft hratt og gosmengun hefur mælst í borginni af og til síðustu daga.

Edda Margrét Jensdóttir, leikskólastjóri á Bakkaborg, segir foreldra barnanna þar velta gosmenguninni töluvert fyrir sér þar sem börnin séu oft úti yfir daginn og margir hafi áhyggjur af áhrifum hennar. Hún segir foreldra oft hringja og athuga hvort að aðstæður hafi ekki örugglega verið kannaðar en það sé alltaf gert áður en börnin fara út.

Edda Margrét segir leikskólastjóra skoða heimasíðu Umhverfisstofnunar þar sem hægt er að sjá hversu mikil gosmengun mælist á hverjum stað hverju sinni. Þá fylgist Heilbrigðiseftirlit Reykjavíkur vel með gosmenguninni og sendir tilkynningar á alla grunn- og leikskóla ef ástæða þykir til. Hún segir loftgæðin alltaf könnuð áður en börnin fara út en það sé tvisvar á dag. Þá séu þau jafnvel skoðuð á meðan að börnin séu úti en þau séu yfirleitt ekki úti nema í klukkutíma í senn.

Edda segir reynt að huga sérstaklega að þeim börnum sem eru með astma eða aðra öndunarfærasjúkdóma. Þeim börnum sé haldið inni á leikskólanum ef beðið er sérstaklega um það.