Mannleg mistök ástæða þess að Brúarfoss rak stjórnlaust að bryggju

Í skýrslu rannsóknarnefndar sjóslysa sem birt var í dag er fjallað um atvik sem átti sér stað í Klettahöfn í janúar í fyrra en þá rak flutningaskip Eimskipa, Brúarfoss, stjórnlaust að bryggju í Sundahöfn. Í skýrslunni segir orðrétt:

„Skipverjar voru búnir að láta sleppa öllum landfestum um kl. 07:05 og hafnarstarfsmenn fóru strax af vettvangi þegar því var lokið. Þegar skipstjóri ætlaði að fara að beita aðalvél virkaði stigningin ekki fyrir skiptiskrúfuna og skipið fór að reka stjórnlaust til vesturs í höfninni. [...] Haft var samband við vélarúm en ekki kom í ljós hvað var að. Brúarfoss rakst, kl. 07:08, með stjórnborðshornið á stefni Dettifoss sem einnig lá við Klettsbakka. Við það skemmdist rekkverk á Brúarfossi og minniháttar skemmdir urðu á stefni Dettifoss.“

Skipið snerist í höfninni svo að skutur þess stefndi til norðvesturs og beint á bryggjuna. Skipstjórinn reyndi að koma skipinu á milli bryggjukanta en það tókst ekki.

Verulega skorti á góð og örugg samskipti milli stjórnenda

„Kl. 07:10 voru bæði akkeri látin falla en ekki tókst að stöðva skipið og um kl. 07:15 lenti það með skutinn nokkuð harkalega á tréhluta bryggjunnar á Korngarðinum. Skuturinn braut sig um fjóra metra inn í bryggjuna [...] en um þetta leyti fóru stjórntök að virka en skemmdir urðu á stýri skipsins. Brúarfoss var því fastur með skutinn inn í bryggjunni.“

Dráttarbáta þurfti til að losa skipið sem komu á staðinn 25 mínútum eftir áreksturinn við bryggjuna. Brúarfoss var svo dreginn að bryggju við Klettsbakka.

Í áliti rannsóknarnefndarinnar í lok skýrslunnar segir:

„Orsök atviksins er röð mannlegra mistaka og að ekki var farið eftir öryggisreglum skipsins um brottför úr höfn. Nefndin telur einnig að skort hafi verulega á góð og örugg samskipti milli stjórnenda þegar ljóst var að skipið svaraði ekki stjórntökum.

 

Sérstök ábending:

 

Nefndin hvetur stjórnendur skipa til að tileinka sér notkun gátlista við störf sín og nota staðlað samskiptakerfi milli starfsstöðva til að tryggja öryggi við komu og brottfarir.“