Miskunnsamur Samverji skilar týndu bardagasverði

Sérhannað bardagasverð sem tekið var úr bíl fyrir framan Nóatún í Hamraborg fyrir tveimur vikum hefur ratað aftur til eiganda síns, Benedikts Kristjánssonar. Í frétt Vísis þann 3. júlí biðlaði Benedikt til þjófsins eða þjófanna að skila sverðinu, enda væri það bæði verðmætt og hefði mikið tilfinningagildi.

„Það var ekki þjófurinn sem skilaði þessu, en það var þó miskunnsamur Samverji sem náði því og kom með það til mín,“ segir Benedikt. „Einhvern veginn náði viðkomandi sverðinu, hringdi í mig og sagði að ég mætti koma og ná í það.“

Benedikt segist þekkja þann sem um ræðir ósköp lítið. Hann efast um að hann sé sá sami og tók sverðið.

„Það er eitthvað svo fjarstæðukennt við það,“ segir Benedikt, sem krafðist ekki útskýringa á því hvernig sverðið fannst. „Ég var búinn að gefa út að það yrðu engir eftirmálar ef sverðið kæmi til baka og ég ætla að standa við það.“

Var búinn að gefa upp alla von

Benedikt, sem er í hafnfirska víkingahópnum Rimmugýgi, segist hafa verið búinn að gefa upp alla von um að sjá sverðið sitt aftur.

„Hlutir sem týnast eða eru stolnir koma sjaldnast til baka,“ segir hann. „Auðvitað hélt maður í einhverja von en allt raunsæi sagði manni að sverðið væri týnt og tröllum gefið. Stundum þarf maður bara að hlusta á hjartað í staðinn fyrir heilann.“

Ekkert sér á sverðinu þrátt fyrir tveggja vikna ferðalag. Benedikt segir að það verði ekki notað mikið á næstunni, þar sem flestir meðlimir Rimmugýgs eru um þessar mundir staddir á víkingahátíð í Danmörku.

„Sverðið verður dregið fram þegar æfingar byrja aftur, það verður eflaust í september. Þangað til þá er það nú bara falið inni í herbergi.“