Ósáttur við að árásarmaðurinn gangi laus

Brynjar Dagbjartsson, trésmiður, varð fyrir fólskulegri árás tveggja lettneskra ríkisborgara í nóvember á síðasta ári er hann kom að þeim brjótast inn í sumarbústað við Reykjaskóg í Bláskógabyggð. Sauma þurfti þrettán spor í andlit Brynjars, auk þess sem hann rifbeinsbrotnaði og skaddaðist á öðru lunga.

Annar árásarmannanna, karlmaður á þrítugsaldri, var í fyrradag dæmdur í tveggja mánaða óskilorðsbundið fangelsi í Héraðsdómi Suðurlands og er gert að greiða Brynjari þrjú hundruð þúsund krónur í skaðabætur.

Brynjari finnst dómurinn ósanngjarn og réttarkerfið lélegt þegar kemur að málum sem þessum. Hann telur ekki að herða þurfi réttarkerfið en segir að því þurfi að breyta.

„Hann ætti allavega að vera látinn sitja inni. Ekki þetta skilorð,“ segir Brynjar í viðtali í útvarpsþættinum Reykjavík síðdegis.

„Mér finnst þetta voðalega léleg skilaboð. Allavega finnst mér þetta ekki flæma menn frá því að stunda þessa iðju.“

Daginn örlagaríka hringdi sumarbústaðaeigandi í Gunnar Ingvarsson, bónda á Efri-Reykjum, og tilkynnti honum að farið hefði í gang þjófavarnakerfi í bústaðnum og bað hann að kanna hvort allt væri í lagi. Svokölluð nágrannavarsla er á svæðinu og fóru Brynjar og Gunnar saman á staðinn. Þeir sáu að þar voru kveikt ljós og bíll fyrir utan og fór Gunnar heim til sín til að sækja lykil að hliðinu að bústaðahverfinu. Brynjar beið á meðan í bíl sínum og hringdi í lögreglu.

„Þessir menn koma gangandi út úr hverfinu. Ég bið bara góða hvoldið og þessi maður svaraði og talaði bara nokkuð góða íslensku. Ég spurði hvað þeir væru að gera og þeir sögðust bara vera að skoða sig um. Ég spurði hvort þeir vildu ekki hinkra því þarna hefði skeð innbrot og til að þeir væri lausir allra mála, vitandi það að þetta voru mennirnir sem höfðu verið að verki,“ segir Brynjar.

„Við það að hann heyrði nafnið lögregla þá trylltist hann og reif upp hurðina. Ég vissi bara ekki hvað á mig stóð veðrið. Bíllinn var í gangi hjá mér og þegar hann byrjar að slá í mig þá teygi ég mig í skiptinguna og set í bakk og flæmist hann þá undan hurðinni.“

Brynjar segir þetta erfiða lífsreynslu og segist hálf stressaður eftir að þetta gerðist.

Hann veit ekki hvort málinu verður áfrýjað, en hann hefur sjálfur íhugað að kæra mennina sjálfur.

Eins og fyrr segir var maðurinn dæmdur í 2 mánaða skilorðsbundið fangelsi og er gert að greiða Brynjari 300 þúsund krónur. Þá er honum jafnframt gert að greiða 500 þúsund í sakarkostnað.